Amakuru yako kanya

Real Madrid igeze ku bwumvikane bw’ibanze (verbal agreement) na Chelsea ku isinywa ry’umukinnyi Marc Cucurella , ukina ku mwanya w’umusore ukina inyuma ku ruhande rw’ibumoso.

Amakuru aturuka mu mpande zitandukanye yemeza ko impande zombi zumvikanye, harimo n’umukinnyi ubwe, ndetse ko ari we wifuzwaga cyane n’umutoza José Mourinho.

Nubwo ayo makuru ataratangazwa ku mugaragaro, bivugwa ko ibisobanuro birambuye by’amasezerano n’ibijyanye n’igiciro bishobora gutangazwa mu minsi iri imbere.

Ubushakashatsi bwakozwe na Reuters ku bufatanye na Ipsos bugaragaza ko hafi kimwe cya kabiri cy’Abakirisitu b’Abavanjelika, bagize igice kinini cy’abashyigikiye Perezida Donald Trump, batishimira uburyo ubutegetsi bwe buri kwitwara ku ntambara ya Iran ndetse n’ikibazo cy’abimukira. Benshi muri bo bavuga ko izi politiki zidahuye n’indangagaciro n’inyigisho z’Ubukirisitu basanzwe bemera.

Perezida Paul Kagame akaba n’Umugaba w’Ikirenga w’Ingabo z’u Rwanda, yashimye ubuyobozi bwa RDF ku ruhare bugira mu guteza imbere Ishuri Rikuru rya Gisirikare rya Nyakinama, kugira ngo ritange ubumenyi n’amahugurwa ari ku rwego rwo hejuru mu gucunga umutekano. Yabivugiye mu muhango wo gutanga impamyabushobozi ku ba Ofisiye Bakuru 108 bo mu Rwanda no mu bihugu by’inshuti barangije amasomo muri iri shuri.

Perezida Kagame yavuze ko aba basirikare bageze i Nyakinama bafite ubunararibonye ariko bakaba bahavuye bafite ubumenyi bwagutse n’ubushobozi bwo gufata inshingano zikomeye. Yongeyeho ko amasomo bahawe atabafashije gusa mu gukemura ibibazo by’umutekano, ahubwo yanabafashije kubaka ubufatanye n’imikoranire, ibintu yavuze ko ari ingenzi mu guhangana n’ibibazo bikomeye ndetse n’ibishobora kugaragara nk’ibidashoboka.

Minisitiri w’Ububanyi n’Amahanga wa Misiri, Badr Abdelatty, yasabye Leta Zunze Ubumwe z’Amerika na Iran gukoresha neza amahirwe abonetse kugira ngo bagere ku masezerano yo guhagarika intambara, nk’uko byatangajwe na BBC Persian. Ibi yabivuze nyuma y’uko Perezida wa Amerika, Donald Trump, asubitse ibitero bishya bikomeye yari yatangaje ko byari kugabwa kuri Iran.

Kuva Amerika na Israel batangiza intambara kuri Iran ku wa 28 Gashyantare 2026, isoko mpuzamahanga rya peteroli na gaz ryahungabanye cyane, bituma ubukungu bw’Isi bwinjira mu bihe bikomeye. Iran na yo yihimuriye igabanya cyangwa ibuza cyane urujya n’uruza rw’amato anyura mu Muyoboro wa Hormuz, unyuzwamo ibice birenga 20% bya peteroli na gaz bikoreshwa ku Isi.

Kuri uyu wa Gatanu tariki ya 12 Kamena 2026, mu Ishuri Rikuru rya Gisirikare rya RDF Command and Staff College riherereye i Nyakinama mu Karere ka Musanze, hagiye kuba igikorwa cyo gusoza amasomo y’abofisiye Bakuru bamaze igihe bahahugurirwa.

Ikipe ya Real Madrid yatangaje ko yagaruye José Mourinho nk’umutoza mukuru nyuma y’imyaka 13 ayivuyemo. Uyu munya-Portugal w’imyaka 63 yasinyiye kuyitoza imyaka itatu, akazatangira akazi ku wa 13 Nyakanga 2026. Kugira ngo imwegukane, Real Madrid yishyuye Benfica miliyoni 15 z’ama-euro nk’amafaranga yo gusesa amasezerano yari agifitanye n’iyo kipe.

Kugaruka kwa Mourinho byabaye nyuma y’uko Perezida Florentino Pérez yongeye gutorerwa kuyobora Real Madrid ku majwi 65%, yari yaranasezeranyije abafana ko azamugarura. Mu gihe cye cya mbere muri Real hagati ya 2010 na 2013, yatwaye La Liga, Copa del Rey na Supercopa de España. Uyu mutoza wanegukanye UEFA Champions League hamwe na Porto na Inter Milan agarutse gufasha Real Madrid kwikura mu bihe bibi byatumye imara imyaka ibiri itarabasha gutwara igikombe na kimwe.

Inteko Ishinga Amategeko yatangaje ko Icyitegetse Venuste wari umwe mu badepite yanditse asaba kwegura ku nshingano ze nk’umudepite, abisobanura nk’icyemezo yafashe ku mpamvu ze bwite, mu ibaruwa yagejeje ku Muyobozi w’Umutwe w’Abadepite.

Mbere yo kwegura, Icyitegetse Venuste yari umwe mu bagize Komisiyo ishinzwe kugenzura imitunganyirize, ikoreshwa n’imicungire y’ingengo y’imari ya Leta. Yari anahagarariye urubyiruko mu Nteko Ishinga Amategeko, ari mu bagize Umuryango FPR-Inkotanyi.

Papa Leo yasuye Ibirwa bya Canary byo muri Espagne mu rwego rwo kwibutsa isi akaga gakomeye abimukira bahura na ko bashaka kugera i Burayi banyuze mu Nyanja ya Atlantique. Muri uru ruzinduko, aribuka abimukira benshi bapfiriye muri urwo rugendo cyangwa bakaburirwa irengero, anasabe ko hashyirwaho inzira zemewe kandi zitekanye zatuma abantu bimuka badashyira ubuzima bwabo mu kaga.

Urugero rwa Bakary Jaiju, umusore wo muri Gambia wageze muri ibyo birwa nyuma y’iminsi irindwi atoroshye mu nyanja, rugaragaza ubuzima bugoye abimukira benshi banyuramo. Nubwo u Burayi bukomeje gukaza ingamba zo kugenzura abimukira, abayobozi bo mu Birwa bya Canary bavuga ko hakenewe politiki ifasha abantu kuva muri Afurika bakajya gukora i Burayi mu buryo bwemewe n’amategeko, aho gukomeza gushyira ubuzima bwabo mu kaga.

Leta Zunze Ubumwe z’Amerika yemeje ko yagabye igitero ku bwato bwitwa Jalveer, bwari buriho ibendera rya Guinea-Bissau.

Ubuyobozi bukuru bw’ingabo z’Amerika mu karere (CENTCOM) bwatangaje ko ubwo bwato “bwarenze ku mabwiriza y’ihagarikwa” nyuma yo kugerageza gutwara peteroli ya Iran bunyuze mu Kigobe cya Oman.

Nk’uko CENTCOM ibivuga, ubu ni ubwato bwa gatatu ingabo z’Amerika zigabyeho igitero muri iki cyumweru muri ako karere, nyuma y’ibitero byagabwe ku mato ya Marivex na Settebello.

Abategetsi ba Arabia Sawudite bakomeje gushyira mu bikorwa ibihano by’urupfu ku banya-Ethiopia, aho abantu bane bishwe hagati yo ku wa Mbere no ku wa Gatatu w’iki cyumweru. Ibi byatumye umubare w’abanya-Ethiopia bamaze kwicwa muri icyo gihugu mu mezi make ashize ugera kuri barindwi, nk’uko amakuru BBC yamenye abyerekana.

Muri Arabia Sawudite, igihano cy’urupfu gikunze gushyirwa mu bikorwa binyuze mu guca umutwe hakoreshejwe inkota, hakurikijwe amategeko ya Sharia, nubwo rimwe na rimwe hanakoreshwa kuraswa.

Umusifuzi w’Umunya-Somalia Omar Artan yimwe uburenganzira bwo kwinjira muri Leta Zunze Ubumwe z’Amerika, aho yageze ku Kibuga Mpuzamahanga cya Miami afite viza ya dipolomasi. Abategetsi b’Amerika bavuze ko iki cyemezo cyafashwe nyuma y’igenzura ryimbitse ryagaragaje amakuru amushinja kugira isano n’abakekwaho kuba mu mitwe y’iterabwoba.

Artan, w’imyaka 34 akaba yarigeze gutorwa nk’umusifuzi mwiza muri Afurika mu 2025, yoherejwe gusubira muri Somalia nyuma yo kwangirwa kwinjira. We ubwe yahakanye ibyo aregwa, avuga ko yabajijwe ku bijyanye n’ishami rya al-Shabab ariko akavuga ko nta kintu na kimwe ariziho.

Perezida Donald Trump yavuze ko yishimiye izamuka ry’ibiciro, mu gihe imibare mishya igaragaza ko muri Gicurasi ibiciro muri Amerika byiyongereye ku muvuduko utarigeze ugaragara mu myaka itatu ishize.

Raporo y’Ibiro bishinzwe Ibarurishamibare ry’Umurimo (BLS) yerekana ko muri Gicurasi ibiciro by’ibicuruzwa na serivisi byazamutseho 4.2% ugereranyije n’igihe nk’icyo cy’umwaka ushize, bivuye kuri 3.8% byariho muri Mata.

Abasesenguzi bavuga ko iri zamuka ryatewe ahanini n’izamuka ry’ibiciro by’ingufu, cyane cyane amashanyarazi n’ibikomoka kuri peteroli, nyuma y’amakimbirane ya gisirikare hagati y’Amerika na Israel ku ruhande rumwe na Iran ku rundi.

Perezida wa Ukraine, Volodymyr Zelensky, yatangaje ko ingabo z’icyo gihugu zagabye igitero cya misile ku ruganda rwa gisirikare ruri imbere mu Burusiya mu ijoro ryo ku wa Kabiri.

Yavuze ko ibisasu bya FP-5 Flamingo byaraswe ku ruganda rukora ibikoresho bikoreshwa na drones mu Mujyi wa Cheboksary, uri ku ntera y’ibirometero bisaga 900 uvuye ku mupaka wa Ukraine.

Abayobozi bo muri ako karere batangaje ko abantu batatu bakomerekeye muri icyo gitero cya misile cyibasiye uwo mujyi.

Urukiko rwo muri Dallas, muri leta ya Texas muri Leta ZUnze Ubumwe z’Amerika, rwahamije icyaha Karmelo Anthony, wari umunyeshuri w’imyaka 17 igihe icyaha cyabaga, rumuhamya kwica Austin Metcalf banganyaga imyaka. Ibi byabereye ku kibuga cya Kuykendall Stadium muri Mata 2025, aho abo banyeshuri bombi bari bitabiriye amarushanwa yo gusiganwa ku maguru.

Umuntu umwe yishwe arashwe mu gihe cy’imyigaragambyo yabereye mu Mujyi wa Nanyuki muri Kenya, aho abaturage bigaragambyaga bamagana umushinga wo kubaka ikigo cy’akato cya Ebola cyagenewe Abanyamerika. Abari aho bavuga ko uwo muntu yarashwe n’abapolisi, nubwo kugeza ubu polisi itaratangaza icyo ibivugaho.

Abigaragambyaga bari bafite amabendera ya Kenya, ibyapa byamagana uwo mushinga ndetse banatwaye isanduku yari yanditseho “Ebola”, basaba ko gahunda yo kubaka icyo kigo ku birindiro bya gisirikare biri muri ako gace ihagarikwa. Mu rwego rwo gutatanya abo bigaragambyaga, polisi yakoresheje imyuka iryana mu maso.

Abasirikare babiri b’Amerika bari mu kajugujugu ya gisirikare yo mu bwoko bwa AH-64 Apache yaguye hafi y’Inyanja ya Oman ku wa Mbere bakijijwe n’ubwato bw’ikoranabuhanga butagira umushoferi (drone yo mu mazi), nk’uko abayobozi b’ingabo z’Amerika babitangaje.

Ishami ry’Umuryango w’Abibumbye ryita ku Buzima (OMS/WHO) ryasabye Uganda kongera gusuzuma icyemezo cyo gufunga umupaka uhuza iki gihugu na Repubulika Iharanira Demokarasi ya Congo (RDC), cyafashwe mu rwego rwo kwirinda ikwirakwira ry’icyorezo cya Ebola.

Ibi byatangajwe n’Umuyobozi Mukuru wa OMS, Tedros Adhanom Ghebreyesus, ubwo yasuraga ikigo cyita ku barwayi ba Ebola giherereye ku Bitaro bya Mulago National Referral Hospital i Kampala. Yavuze ko Uganda yakoze akazi kagaragara mu kurwanya Ebola, ayishimira uburyo yihutiye gufata ingamba no guhangana n’iki cyorezo mu buryo bunoze.

Urukiko rukuru rwa Kenya rwemeje ko iyeguzwa rya Rigathi Gachagua ku mwanya wa Visi Perezida ryakozwe mu buryo bwemewe n’amategeko, rutesha agaciro ibirego bye byavugaga ko yibasiwe ku mpamvu za politiki. Icyakora, urukiko rwasanze Sena yarahonyoye uburenganzira bwe ubwo yakomezaga ibikorwa byo kumweguza kandi arwaye, rutegeka ko ahabwa indishyi ya miliyoni 50 z’amashilingi ya Kenya.

Iki cyemezo gikomeje gukoma mu nkokora inzozi za Gachagua zo kongera kwinjira mu buyobozi bw’igihugu cyangwa kwiyamamariza umwanya wa Perezida. Urukiko kandi rwemeje Kithure Kindiki nk’uwamusimbuye, mu gihe Gachagua we yatangaje ko azajuririra iki cyemezo nyuma yo gushwana bikomeye na Perezida William Ruto no gukurwa ku butegetsi ashinjwa ruswa, gukurura amacakubiri no kubangamira imikorere ya leta.

Omar Abdulkadir Artan, wari kuba Umunya-Somaliya wa mbere ugiye gusifura imikino ya nyuma y’Igikombe cy’Isi, yavanywe ku rutonde rw’abasifuzi bazakora muri iri rushanwa nyuma yo kubuzwa kwinjira muri Leta Zunze Ubumwe z’Amerika.

Artan, watowe n’Ishyirahamwe Nyafurika ry’Umupira w’Amaguru (CAF) nk’umusifuzi mwiza w’Afurika wa 2025, yahagaritswe ageze ku Kibuga cy’Indege Mpuzamahanga cya Miami, ahita asubizwa inyuma. Kuri ubu ari muri Turukiya.

Igikombe cy’Isi cya 2026 gitegerejweho kuzana impinduka zikomeye mu mategeko agenga umupira w’amaguru, zizagira ingaruka ku buryo umukino ukinwa ndetse n’uko ucungwa.

Izi mpinduka zifite intego yo kugabanya gutinza umukino, kongera ubutabera mu ifatwa ry’ibyemezo by’abasifuzi, ndetse no gukumira amayeri asubiza inyuma umuvuduko w’umukino.

Perezida wa Komite y’Abasifuzi muri FIFA, Pierluigi Collina, yatangaje ko hari zimwe muri izi mpinduka zamaze kwemezwa, mu gihe izindi zari ziteganyijwe gushyirwa mu bikorwa muri iri rushanwa rikomeye ry’umupira w’amaguru ku isi ritangira muri iki cyumweru.