Perezida Samia Suluhu Hassan yegukanye intsinzi n’amajwi 98%
Mugitondo cyo kuri uyu wa Gatandatu tariki ya 1 Ugushyingo, Komisiyo y’Amatora muri Tanzaniya yatangaje ko Samia Suluhu Hassan, wari usanzwe ari Perezida, ari we watsinze amatora ya perezida yabaye ku wa Gatatu tariki ya 29 Ukwakira 2025, n’amajwi hafi 98%.
Atangaza ibyavuye mu matora, Perezida wa Komisiyo y’Amatora, Jacobs Mwambegele yagize ati: “Ntangaje ko Samia Suluhu Hassan yatsinze amatora ya perezida ahagarariye ishyaka rya Chama Cha Mapinduzi (CCM).”
Perezida wa komisiyo y’amatora yavuze ko Samia yatowe n’abantu miliyoni hafi 31,9, bangana n’amajwi 97,66%, mu matora yitabiriwe ku kigero cya 87% by’abantu miliyoni 37,6 biyandikishije gutora.
Hashingiwe ku itegeko nshinga rya Tanzaniya n’ibi byatangajwe na Komisiyo y’Amatora, Perezida Samia, w’imyaka 65, yitezwe gutegeka iki gihughu kuri manda ya kabiri y’imyaka itanu.
Nubwo hatangajwe ibyavuye mu matora, abayakurikiraniye hafi bo mu mahanga bavuga ko bafite impungenge kuko atabaye mu mucyo nio mu bwisanzure ndetse n’imvururu zabaye hirya no hino mu gihugu zahitanye amagana ndetse abandi benshi barakomereka.
Ishyaka rya Chama Cha Mapinduzi (CCM), Samia arimo, rimaze imyaka hafi 50 ku butegetsi. Ryari ryitezwe na benshi gutsinda amatora n’amajwi menshi cyane.
Mu birwa bya Zanzibar bifite ubwigenge bucagase – bitora leta y abyo bwite na perezida wa byo bwite – Hussein Mwinyi, wa CCM, ari na we Perezida uri ku butegetsi, yatsinze amatora n’amajwi hafi 80%.
Perezida Samia yageze ku butegetsi mu mwaka wa 2021 nka Perezida wa Tanzaniya wa mbere w’umugore, nyuma y’urupfu rw’uwo yasimbuye Perezida John Magufuli, yari abereye Visi Perezida.
