Perezida Touadéra yahishuye icyo yaganiriye na Perezida Kagame
Perezida wa Repubulika ya Centrafrique (CAR), Faustin-Archange Touadera, yahishuye icyo yaganiriye na Perezida Paul Kagame mu ruzinduko rw’iminsi ibiri aheruka kugirira i Kigali guhera ku wa 23 Ugushyingo 2025.
Mu butumwa yanyujije ku rukuta rwe rwa X, Touadéra yavuze ko baganiriye ku matora azaba mu gihugu cye mu kwezi k’Ukuboza.
Yagize ati: “Nahuye na Perezida Paul Kagame kugira ngo tuganire ku mutekano mbere y’amatora azaba ku wa 28 Ukuboza no gushimangira ubucuti n’ubufatanye hagati y’ibihugu byacu”.
Touadéra yavuze ko inkunga n’ishoramari ry’u Rwanda muri Centrafrique, harimo imishinga y’iterambere, bigaragaza imbaraga z’ubu bufatanye.
Uyu ni uruzinduko rwa mbere rwa Touadera mu Rwanda mu myaka ishize ayobora Centrafrique, kandi rukaba rwerekana ubufatanye bukomeye bw’ibi bihugu mu guhangana n’ibibazo by’umutekano no guteza imbere abaturage babo.
U Rwanda na Centrafrique (CAR) basanzwe bafitanye ubufatanye bukomeye mu nzego zitandukanye burimo umutekano, iterambere n’ubukungu.
Mu rwego rw’umutekano, u Rwanda rufasha CAR guhugura ingabo n’abapolisi no kubaka ubushobozi bwabo kugira ngo hashyirweho amahoro no kurwanya imitwe yitwaje intwaro.
Mu iterambere n’ubukungu, u Rwanda rufatanya na CAR mu mishinga y’ubuhinzi, amashanyarazi, amazi, ibikorwa remezo n’uburezi, bigamije guteza imbere imibereho myiza y’abaturage no kongera umusaruro w’igihugu.
Perezida Faustin-Archange Touadéra amaze imyaka 9 ayobora Centrafrique kuva agiye ku butegetsi mu 2016, kandi mu matora ateganyijwe ku wa 28 Ukuboza 2025, aziyamamariza manda ye ya gatatu.
