RDC: Umushinga w’uko buri wese w’urubyiruko agomba guca mu gisirikare
Inteko Ishinga Amategeko ya Repubulika Iharanira Demokarasi ya Congo (RDC) yemeye kwakira umushinga w’itegeko usaba ko urubyiruko rw’imyaka 18 kugeza kuri 30 rwose rujya gukora igisirikare ku itegeko nk’uko radio-televiziyo y’iki gihugu, RTNC ibivuga.
Uyu mushinga watanzwe na Depite Claude Misare uhagarariye Uvira, uvuga ko igihugu kidakwiye gukomeza kwishingikiriza ku ngabo z’amahanga mu gucunga umutekano, cyane cyane mu gihe gihanganye n’imitwe y’inyeshyamba nka M23, ADF n’indi iri mu burasirazuba bwa RDC.
Misare avuga ko umubare munini w’urubyiruko rwa RDC ushobora gufasha mu kongera ingabo, cyane ko iki gihugu kimaze imyaka cyongera umubare w’abasirikare n’ingengo y’imari y’igisirikare. Mu 2022 hinjijwemo abasirikare barenga ibihumbi 10, naho mu 2023 Perezida Tshisekedi yinjiza abandi basaga ibihumbi 31.
Abadepite bagiye impaka kuri uyu mushinga—abamwe bawushyigikiye bavuga ko watuma igisirikare gikomera kandi ukagira uruhare mu kongera ubumwe bw’igihugu kuko abaturage b’amoko yose bakwinjira mu gisirikare. Gusa abandi babona ko iki gitekerezo kidafite ishingiro, kuko kwinjiza urubyiruko rwa miliyoni nyinshi mu gisirikare bitashoboka mu gihe igihugu gifite ibikoresho n’ubushobozi buke bwo kubakira.
Uyu mushinga wa Misare watanzwe mu kwezi kwa Werurwe, ariko ku wa Gatanu tariki ya 21 Ugushyingo 2025 ni bwo watangiye gusuzumwa mu buryo bwemewe. Ni igitekerezo gihuriranye n’ibyigeze kuvugwa na Minisitiri w’ingabo mu 2022, wifuzaga gushyiraho itegeko ryo gukora igisirikare mu gihe cy’imyaka itanu cyangwa icumi.
Misare anenga ko RDC ikomeza kwifashisha ingabo z’amahanga mu guhangana n’ubushotoranyi bw’ibihugu bituranyi no mu kurwanya imitwe yitwaje intwaro, mu gihe igihugu ubwacyo gifite abaturage bafite imbaraga bakwiye gutora intwaro bakagarura umutekano.
Nyuma yo gutorwa, uyu mushinga woherejwe muri komisiyo y’ingabo n’umutekano kugira ngo iwusuzume mu minsi irindwi. Mu bice bimwe by’Afurika harimo Algeria, Eritrea, Mali na Maroc, amategeko yo gukora igisirikare ku itegeko asanzweho, nubwo hose adakurikizwa kimwe.
Ku rundi ruhande, hari abadepite bavuga ko gushyira mu bikorwa iri tegeko bidashoboka, bakaburira Inteko kwitonda kugira ngo itemeza ibintu igihugu kitazabasha gushyira mu bikorwa.
