Sénégal yateye utwatsi icyemezo cya CAF kiyambura Igikombe cya Afurika cya 2025
Ishyirahamwe ry’Umupira w’Amaguru muri Sénégal (FSF), ryateye utwatsi icyemezo cy’Impuzamashyirahamwe y’Umupira w’Amaguru muri Afurika (CAF) cyambura Sénégal Igikombe cya Afurika cya 2025 yari yaratwaye kigahabwa Maroc kuri mpaga y’ibitego 3:0.
Ishyirahamwe ry’Umupira w’Amaguru muri Sénégal (FSF) ryamaganye icyo cyemezo, ivuga ko ari akarengane, kidasobanutse ndetse kinahungabanya icyizere mu miyoborere y’umupira w’amaguru muri Afurika.
Iri shyirahamwe ryashimangiye ko ibyavuye mu kibuga Sénégal yari yatsinze Maroc igitego 1-0 bidakwiye guteshwa agaciro n’ibyemezo byo hanze y’ikibuga.
Ku wa Kabiri tariki ya 17 Werurwe 2026 ni bwo CAF yatangaje ko Sénégal yambuwe igikombe cya Afurika kigahabwa Maroc, nyuma yo kuyitera mpaga y’ibitego 3-0.
Ni icyemezo cyateje impaka zikomeye hirya no hino ku Isi, aho abakunzi b’umupira, abasesenguzi ndetse n’abahoze ari abakinnyi bibaza ku buryo cyafashwemo n’ingaruka zacyo.
Ishyirahamwe ry’umupira w’amaguru muri Senegal rivuga ko urugamba rutararangira, kuko nyuma yo kwamburwa igikombe yatangaje ko igiye gutanga ikirego mu Rukiko Mpuzamahanga Nkemurampaka mu bya Siporo (CAS). Uru rukiko rufatwa nk’urwego rwo hejuru mu gukemura amakimbirane ya siporo ku Isi.
Biteganyijwe ko Senegal izashyiraho itsinda ry’abanyamategeko bagomba gukusanya ibimenyetso birimo raporo z’umukino, ibyemezo by’abasifuzi n’amashusho y’umukino, mbere yo gutanga ikirego ku mugaragaro.
