Sudani: Igitero cya drone cyagabwe mu bukwe cyahitanye abarenga 40
Abantu barenga 40, barimo n’abagize umutwe wa Rapid Support Forces (RSF), biciwe mu gitero cya drones cyagabwe mu bukwe bwaberaga i Kutum, mu majyaruguru ya Darfur.
Bivugwa ko iki gitero cyahitanye abantu 40 barimo abana 17, abandi 107 barakomereka.
Aka gace ka Kutum kagenzurwa n’umutwe wa RSF kuva intambara yatangira muri Mata 2023.
Uyu mujyi wagiye ugabwaho ibitero by’indege zitagira abapilote, bikekwa ko bigabwa n’Ingabo za Sudani.
Ni ibitero byibasiye ibirindiro bya RSF, ibitaro byaho ndetse n’isoko rikuru.
Ibinyamakuru birimo Sudan Tribune bivuga ko byibuze abantu 40 bapfuye abandi barenga 100 barakomereka igihe igitero cya drone cyarasaga ahaberaga umuhango w’ubukwe mu gace ka Al-Salam.
Iki gitero ngo cyanasenye amazu menshi, gituma imiryango myinshi ihunga.
Alaeddine Naqd, Umuvugizi w’ihuriro “Tasis”, umutwe wa politiki ufatanyije na RSF, mu itangazo yashyize hanze yatangaje ko iki gitero ari icy’ingabo za Sudani.
