Tanzaniya: Konti za “Instagram” z’umwe mu byamamare ushinjwa gutegura imyigaragambyo, zasibwe
Mange Kimambi, impirimbanyi w’uburenganzira bwa muntu ndetse n’icyamamare kuri Instagram muri Tanzaniya, yashinje leta y’iki gihugu gufunga konti ze ku mbuga nkoranyambaga, aho zakuwemo kubera gushishikariza Abanyatanzaniya kwitabira imyigaragambyo yo kwamagana amatora.
Kimambi, wahoze ari umunyamideli ubu akaba aba muri Leta Zunze Ubumwe z’Amerika, ni umwe mu batinyuka kunenga Perezida Samia Suluhu Hassan akoresheje imbuga ze nkoranyambaga yari afite hafi miliyoni eshatu z’abamukurikira kuri Instagram.
Nyuma yo gukurwaho kwa konti ze, Kimambi yiyambaje Urwego rw’Igihugu rw’Ubugenzacyaha, bituma abantu batanu batabwa muri yombi. Umwe mu baregwa yasabye ko na Kimambi yakurikiranwa kuko ari we wafashe amashusho kandi akayabika kuri email yari izwi n’abandi.
Meta, sosiyete ifite Instagram WhatsApp na Facebook, yabwiye BBC ko konti zakuwemo kubera kurenga ku mabwiriza ya yo. yagize iti: “Ntitwemerera abantu gufungura konti nshya zimeze kimwe n’izindi twakuyeho mbere kubera kurenga ku mabwiriza yacu”.
Kimambi yashyizeho ubutumwa avuga ko ibi ari igitutu gishobora kuba cyatewe na leta ya Tanzaniya kugira ngo bace intege abaharanira uburenganzira bwa muntu.
Mu gihe Leta ya Amerika isuzuma umubano wa yo na Tanzaniya kubera impungenge ku burenganzira bwa muntu n’iyubahirizwa rya demokarasi, Kimambi yasabye ko yasubizwa konti ze.
Ubu urubanza Kimambi ahanganye na rwo muri Dar es Salaam rurimo no kumushinja guhungabanya ubukungu n’amafaranga angana na miliyoni 80 FRW avugwa ko yakuye mu bikorwa bidakurikije amategeko. Nubwo ibi byose biri kuba kubera politiki, Kimambi akomeza kwerekana ko atazahagarika kunenga perezida Samia Suluhu Hassan n’ubutegetsi bwe, kandi akomeza gushishikariza abaturage kwitabira imyigaragambyo mu mahoro.
