Tanzaniya yasabwe kwerekana imibiri y’abiciwe mu myigaragambyo
Ambasade z’ibihugu 17 byo mu burengerazuba, birimo Ubufaransa n’Ubwongereza, kimwe na Canada, Norvège n’Ubuswisi, byasabye leta ya Tanzaniya kurekura impfungwa za politiki no gusubiza imiryango imibiri y’abiciwe mu myigaragambyo yabaye nyuma y’amatora yo ku wa 29 Ukwakira 2025, aho Perezida Samia Suluhu Hassan yegukanye intsinzi ku majwi hafi 98%.
Mu itangazo basohoye ku wa Gatanu tariki ya 5 Ukuboza 2025, ibihugu byo mu burengerazuba byashimye intambwe leta yateye yo gukora iperereza ku byabaye, ariko byasabye ko iryo perereza rikorwa mu buryo bwigenga, ku muco, kandi ahuriyemo impande zose, harimo amashyirahamwe adaharanira inyungu za politiki, amadini n’abaturage.
Basabye kandi ko abafunzwe bahabwa uburenganzira bwo kwivuza no kubona ababunganira mu nkiko, ndetse imibiri y’abishwe igashyikirizwa imiryango ya bo.
Umuryango w’Abibumbye (ONU) uvuga ko kuva amatora yaba, abatavuga rumwe na leta bahungabanyijwe, bamwe bakicwa cyangwa bagahagarikwa, kandi abarenga 2,000 bishwe mu myigaragamby yakurikiye amatora.
Umuvugizi w’Ishami ry’Umuryango w’Abibumbye Ryita ku Burenganzira bwa Muntu, Seif Magango, yavuze ko abenshi mu bahagaritswe bafashwe mu buryo butubahirije amategeko.
Leta ya Tanzaniya ivuga ko yashyizeho itsinda rishinzwe iperereza ku byabaye, ariko Perezida Samia Suluhu Hassan yavuze ko gukoresha imbaraga mu guhashya imyigaragambyo byari ngombwa kuko bari bagambiriye guhirika ubutegetsi.
Leta ya Leta Zunze Ubumwe z’Amerika ivuga ko iri gusuzuma imigenderanire n’iki gihugu kubera impungenge z’ukutubahiriza uburenganzira bwa muntu no kurengera umutekano w’abaturage.
Perezida Samia Suluhu Hassan ni we mugore wa mbere wabaye Perezida wa Tanzaniya nyuma y’urupfu rwa John Pombe Magufuli mu 2021, ariko kuva icyo gihe, uburyo bwo gukumira abatavuga rumwe na leta bwakomeje gukaza umurego.
Imiryango ibabajwe no kutabona imibiri y’ababo biciwe mu myigaragambyo yakurikiye amatora muri Tanzaniya (Ifoto: BBC)
