Tshisekedi, Gnassingbé na Lourenço bagiranye ibiganiro by’amasaha atanu ku kibazo cy’intambara muri DRC

Perezida w’Angola, João Manuel Lourenço, yakiriye bagenzi be ba Repubulika Iharanira Demokarasi ya Congo na Togo mu biganiro byabereye ku ngoro ye i Luanda ku mugoroba wo ku wa Mbere, bigamije gushaka ibisubizo ku ntambara ikomeje mu burasirazuba bwa Repubulika Iharanira Demokarasi ya Congo.

Ibi biganiro byahuje Perezida Lourenço, Félix Tshisekedi wa DR Congo na Faure Gnassingbé wa Togo, binitabirwa na Olusegun Obasanjo uyoboye itsinda ry’abahuza ryashyizweho n’Ubumwe bw’Afurika.

Nk’uko byatangajwe n’Ibiro Ntaramakuru by’Angola, ANGOP, inama yamaze amasaha agera kuri atanu, yibanda ku ngingo zirimo guhagarika imirwano byihuse, kubahiriza amasezerano yashyizweho, guteza imbere ibiganiro hagati y’Abanye-Congo, ndetse no kurebera hamwe uko imitwe itavuga rumwe n’ubutegetsi yafatanya n’abandi mu gushakira hamwe umuti w’amakimbirane.

Ibiro bya Perezida wa Togo, ari na we muhuza w’Ubumwe bw’Afurika kuri iki kibazo, byasobanuye ko ibiganiro byabereye i Luanda byari byimbitse kandi byubaka, bigamije gushaka igisubizo gishingiye ku bushake n’ubushobozi bw’Afurika ku ntambara yo mu burasirazuba bwa Congo.

Ku ruhande rwa Kinshasa, ibiro bya Perezida wa DR Congo byatangaje ko abayobozi bongeye gushimangira ko guhagarika imirwano bidakwiye kuba biganisha ku mananiza, ndetse ko hakwiye gukurikiranwa no kugenzurwa ibyo buri ruhande rwemeye.

Ibyo biganiro byanahaye Angola inshingano yo kwakira no kumva impande zo muri Congo zifuza kwitabira ibiganiro by’Abanye-Congo, biteganyijwe gutegurwa n’inzego za leta, nk’uko byasobanuwe n’ibiro bya Perezida wa DR Congo.

Nubwo Angola isanzwe igira uruhare rukomeye muri iki kibazo, mu mezi menshi y’umwaka ushize umuhate wa yo n’uw’Ubumwe bw’Afurika wari warasubijwe inyuma n’ibiganiro byari biyobowe n’Amerika i Washington ndetse na Qatar i Doha.

Gusa guhera mu kwezi gushize, bigaragara ko Ubumwe bw’Afurika bwongeye kongera imbaraga mu gushaka igisubizo, cyane ko amasezerano ya Washington atarashyirwa mu bikorwa uko bikwiye, naho inzira ya Doha imaze amezi hafi icumi itarageza ku musaruro ufatika.

Hagati aho, biteganyijwe ko mu mpera z’iki cyumweru, mu nama izabera i Addis Ababa muri Ethiopia, Perezida Évariste Ndayishimiye w’u Burundi azasimbura João Lourenço ku mwanya w’umukuru w’Ubumwe bw’Afurika.

Ibiro bya Perezida wa Togo byavuze ko Faure Gnassingbé yasubiyemo ubushake bwe bwo gukomeza kuganira n’impande zose bireba, afatanyije n’abahuza, hagamijwe kugera ku gisubizo kirambye ku ntambara yo mu burasirazuba bwa DR Congo.