U Rwanda na CAR basuzumye ubufatanye n’umutekano mu ruzinduko rwa Perezida Touadéra
U Rwanda na Repubulika ya Centrafrica (CAR) basuzumye ubufatanye n’umutekano mu ruzinduko Perezida Faustin Archange Touadéra yagiriye mu Rwanda ku mugoroba wo kuri iki Cyumweru tariki ya 23 Ugushyingo 2025.
Muri uru ruzinduko rw’akazi rw’iminsi ibiri ari kugirira mu Rwanda, Perezida Touadéra yakiriwe na Perezida w’u Rwanda Paul Kagame nk’uko bigaragara ku rukuta rwa X rw’Ibiro by’Umukuru w’u Rwanda.
Ibiganiro bagiranye byibanze ku bufatanye busanzwe buriho hagati y ‘ibi bihugu byombi cyane cyane inkunga u Rwanda rutanga binyuze mu ngabo za RDF zikorera ku masezerano y’umutekano hagati y’ibihugu byombi, kimwe n’amasezerano y’Umuryango w’Abibumbye.
Uretse ibyo kandi, abakuru b’ibihugu byombi banaganiriye ku mahirwe yo gukomeza ubufatanye mu nzego zitandukanye zungura abaturage ba CAR n’u Rwanda.
U Rwanda na Repubulika ya Centrafrica basanzwe bafitanye umubano ukomeye mu by’umutekano, ubuhahirane n’iterambere. U Rwanda rufasha CAR binyuze mu ngabo za rwo (RDF) zikorera ku masezerano y’umutekano hagati y’ibihugu byombi, ndetse na Misiyo y’Umuryango w’Abibumbye igamije kugarura amahoro mu bice by’icyo gihugu byahungabanyijwe n’intambara. Hanakorwa ubufatanye mu nzego z’iterambere n’imibereho myiza y’abaturage, harimo uburezi, ubuhinzi, ubuzima n’ubucuruzi. Guverinoma y’u Rwanda inafasha CAR mu bikorwa by’amahoro mpuzamahanga no mu mishyikirano y’akarere.
Perezida Faustin Archange Touadéra ayoboye CAR kuva mu 2016, bivuze ko amaze imyaka 9 ku butegetsi, kandi mu gihe cy’ubuyobozi bwe, umubano n’u Rwanda warushijeho gukomera, cyane cyane mu bufatanye bw’ingabo n’umutekano no mu guteza imbere imibereho y’abaturage.
Perezida Kagame yakiriye Perezida Faustin Archange Touadéra wa Repubulika ya Centrafrica
