U Rwanda na RDC bongeye kuganirira i Washington
Ku ya 19-20 Ugushyingo 2025, abahagarariye Repubulika Iharanira Demokarasi ya Kongo (RDC) n’u Rwanda, hamwe n’abahagarariye Leta Zunze Ubumwe za Amerika, Leta ya Qatar, Repubulika ya Togo (nk’umuhuza w’Umuryango w’Afurika Yunze Ubumwe) ndetse na Komisiyo y’Umuryango w’Afurika Yunze Ubumwe, bateraniye mu nama ya kane y’Itsinda rihuriweho rishinzwe gukurikirana umutekano (Joint Security Coordination Mechanism – JSCM) i Washington, D.C., hagamijwe guteza imbere ishyirwa mu bikorwa ry’Amasezerano y’Amahoro ya Washington yasinywe ku ya 27 Kamena 2025.
Iyi nama yibanze ku cyiciro cya kabiri cy’umugambi wo kurandura umutwe wa FDLR ndetse no gukuraho ingamba z’ubwirinzi u Rwanda rwari rufite.
Mu cyiciro cya mbere, hatangwaga amakuru y’ubutasi no gukangurira abarwanyi ba FDLR gushyira intwaro hasi bagasubizwa mu gihugu cya bo.
Mu bihe byashize, mu bice bya Walikale mu Kivu y’Amajyaruguru, bamwe mu barwanyi ba FDLR bamaze kwishyikiriza ingabo za MONUSCO basubizwa mu Rwanda, n’ubwo abandi bavuga ko batiteguye gutaha.
Amasezerano ya Washington ateganya gukoresha imbaraga mu kurandura FDLR, ariko igihe n’uburyo ntibiramenyekana neza.
Leta ya RDC n’iy’u Rwanda zashimiye Amerika, Qatar, n’Umuryango w’Afurika Yunze Ubumwe ku bufasha mu biganiro by’amahoro, mu gihe JSCM yashimiye Togo ku gutegura Inama y’urwego ruhanitse ku guhuza no gukomeza ibiganiro by’amahoro mu RDC no mu Karere k’Ibiyaga Bigari izaba ku ya 17 Mutarama 2026, hagamijwe gukomeza kwizerana no guteza imbere amahoro.
Impande zombi zashimiye kandi Perezida Trump ku ruhare rudasimburwa yagize muri iyi gahunda yose. Abitabiriye inama bose kandi biyemeje gukomeza guteza imbere amahoro arambye n’umutekano mu burasirazuba bwa RDC no mu Karere k’Ibiyaga Bigari.
Nubwo umuhate wo kugarura amahoro ukomeje, imirwano iracyakomeza mu bice bya Masisi, Kalehe na Walikale, ikaba yaratumye abarenga ibihumbi icumi (10,000) bahungira mu tundi duce tutarimo imirwano nk’uko bitangwazwa n’Ishami ry’Umuryango w’Abibumbye Rishinzwe Ubutabazi (OCHA).
