Umugore yarikanguye asanga uruziramire runini cyane mu gituza cye, umva uko yahivanye

Mu gicuku cyo ku wa mbere, Rachel Bloor yakangutse yumva hari ikintu kiremereye kimugose ku gituza ari mu buriri bwe. Ataramenya neza ibibaye, yacyegereye atekereza ko ari imbwa ye, ariko atungurwa no kumva ari ikintu cyoroshye kandi kinyerera mu ntoki.

Mu gihe yageragezaga kwinjira neza mu mashuka no kwiyegereza icyo yibwiraga ko ari imbwa ye hafi y’ijosi, umukunzi we yacanye itara ryo ku ruhande rw’uburiri. Ako kanya bombi bahise bamenya ko atari imbwa, ahubwo ari inzoka nini y’uruziramire.

Umukunzi we yamubwiye ati: “Mukundwa, nyabuneka ntunyeganyege. Hari inzoka ndende hafi metero 2.5 iri ku gituza cyawe,” nk’uko Bloor yabibwiye BBC dukesha iyi nkuru. Mu kanya gato, Bloor yabanje kurahira kubera ubwoba, hanyuma ategeka ko imbwa ya bo ikurwa muri icyo cyumba.

Yagize ati: “Natekerezaga ko iyo imbwa yacu Dalmatian ibonye inzoka, byari kuvamo intambara ikomeye.” Imbwa imaze gusohorwa hanze, n’umugabo we yifuje kuyikurikiraho, Bloor asigara wenyine atangira kugerageza kwikuraho iyo nzoka buhoro buhoro.

Yagize ati: “Nageragezaga kunyerera mvamo, ariko mu mutwe wanjye nibazaga nti ‘Ese ibi birabaho koko? Biratangaje cyane.’” Yemeza ko iyo nzoka yo mu bwoko bwa carpet python, itagira ubumara, ishobora kuba yarinjiye inyuze mu idirishya ikamanukira ku buriri.

Amaze kuyikuraho atuje, Bloor yayisubije hanze ayinyujije aho yari yanyuze, atayikomeretsa. Yagize ati: “Yari nini cyane ku buryo nubwo yari imfunze ku gituza cyanjye, umurizo wa yo wari ugisigaye hanze mu idirishya.”

Yongeyeho ko yayifashe atuje, maze abona ko na yo itikanze cyane, imeze nk’inyamaswa ituje iri mu kiganza. Nubwo umugabo we wari hanze yari yahungabanye bikomeye, we ntiyagize ubwoba bwinshi kuko yakuriye mu cyaro aho inzoka zisanzwe ziboneka.

Ati: “Iyo utuje, n’izo nyamaswa ziratuza.” Ariko yemeza ko iyo biba ari igikeri cyo mu bwoko bwa cane toad, kizwiho ubugome n’ingaruka mbi muri Australia, byari kumubera bibi cyane.

Yagize ati: “Sinshobora kubyihanganira, bintera no kuruka. Iyo biba ari igikeri, ni cyo nari gutinya cyane.” Ku bw’amahirwe, abantu bose n’iyo nzoka byasohotse muri iki gikorwa nta n’umwe ugize icyo aba.

Inzoka zo mu bwoko bwa carpet python ziboneka cyane mu bice bya Australia byegereye inyanja, kandi akenshi zitungwa n’inyamaswa nto nk’inyoni.