Umuhanzi w’icyamamare Jimmy Cliff yitabye Imana

Jimmy Cliff, umwe mu bahanzi b’ibihe byose mu njyana ya Reggae na Rock and Roll, yitabye Imana ku myaka 81 azize uburwayi.

Azwi nk’umwe mu bantu bamaranye igihe kinini bafashije kugeza umuziki wa Jamaica ku rwego rw’isi, guhera mu myaka ya 1960 binyuze mu ndirimbo zakunzwe cyane zirimo “Wonderful World”, “Beautiful People” na “You Can Get It If You Really Want”.

Cliff yanabaye icyamamare muri sinema, cyane cyane kubera film yiswe “The Harder They Come”, yagiye imenyekanisha cyane injyana ya reggae muri Leta Zunze Ubumwe z’Amerika.

Urupfu rwe rwatangajwe n’umugore we, Latifa Chambers, abinyujije ku rubuga rwa Instagram, avuga ko yitabye Imana azize indwara yo guturika k’ubwonko yaje gukurikirwa n’ibibazo by’ibihaha. Yashimiye umuryango n’inshuti, ndetse anashimira abafana bose ku isi, avuga ko ubushake bwa bo bwo kumushyigikira bwari imbaraga ze mu rugendo rwe rw’umuziki.

Jimmy Cliff, yavutse mu 1948 yitwa James Chambers, yakuriye mu muryango ukennye wa St James muri Jamaica. Yagaragaje impano y’ijwi akiri muto, atangira kuririmba afite imyaka itandatu mu rusengero. Ku myaka 14 yimukiye Kingston (umurwa mukuru wa Jamaica) aho yatangiye gutera intambwe mu muziki, ahitamo izina “Cliff” nk’ikimenyetso cy’inzozi ndende yashakaga kugeraho.

Yatangiye kumenyekana mu gihugu cye ahereye ku ndirimbo “Hurricane Hattie”, yamufunguriye amarembo yo kumenyekana. Mu 1965 yimukiye i London mu Bwongereza gukorana na “Island Records”, ariko umuziki we watangiye kumenyekana cyane mu 1969 ubwo yasohoraga indirimbo zakunzwe cyane harimo “I Can See Clearly Now” n’iyo yise “Vietnam”, ari na yo umuhanzi Bob Dylan yise imwe mu ndirimbo nziza zigaragaza ubutumwa bwo kwigaragambya.

Indirimbo ye “The Harder They Come”, ijyanye na film yakinnye, yatumye amenyekana ku rwego mpuzamahanga, kuko yagaragazaga ingorane umuhanzi muto ahura na zo mu ruganda rwa muziki rwa Jamaica.

Albums ze “Cliff Hanger (1985)” na “Rebirth (2012)” zamuhesheje ibihembo bya Grammy, naho mu 2010 ashyirwa muri “Rock and Roll Hall of Fame”, urutonde rw’icyubahiro rw’abahanzi b’ibihe byose.

Jimmy Cliff yitabye Imana ku myaka 81