Umunya-Mexique yegukanye ikamba rya “Miss Universe”

21 Ugushyingo 2025 saa 06:52

Irushanwa rya Miss Universe 2025 ku nshuro ya 74, ryaberaga muri Thailand, ryashojwe kuri uyu wa Gatanu tariki ya 21 Ugushyingo 2025, aho ryegukanywe n’Umunya-Mexique, Fátima Bosch Fernández w’imyaka 25 y’amavuko.

Fátima Bosch Fernández yasimbuye Victoria Kjær Theilvig, ukomoka muri Denmark wari ufite ikamba rya 2024.

Miss Universe rizwi cyane ku isi nk’irushanwa ry’ubwiza, rikaba rihuza abantu bo hirya no hino ku isi buri mwaka. Abahagarariye buri gihugu batoranywa binyuze mu marushanwa yo mu bihugu bya bo bagahabwa uburenganzira n’Ikigo gitegura Miss Universe (Miss Universe Organization).

Umukobwa wo muri Thailand, Praveenar Singh, ni we wabaye igisonga cya mbere. Abandi bageze muri batanu ba mbere ni Stephany Abasali wo muri Venezuela, Ahtisa Manalo wo muri Philippines, ndetse na Olivia Yacé wo muri Côte d’Ivoire.

Thailand, igihugu cyakiriye irushanwa uyu mwaka, gifite uruganda rw’imyidagaduro y’amarushanwa y’ubwiza rukomeye kandi rucyinjiriza cyane, rukaba rufite abakunzi benshi muri Aziya kimwe na Filipine.

Irushanwa rya Miss Universe ryitabiriwe n’abakobwa 120 baturutse mu bihugu bitandukanye. Nadeen Ayoub yabaye Umunya-Palestina wa mbere uhatanye muri iri rushanwa, kimwe n’Umunyarwandakazi, Solange Tuyishime Keita, bageze mu bakobwa 30 ba nyuma. Umuhango wa nyuma wayobowe n’umunyarwenya w’Umunyamerika, Steve Byrne, kandi ufungurwa n’umuririmbyi Jeff Satur wo muri Thailand.

Nyuma y’icyiciro cyo kwiyerekana, abakobwa 30 baragabanyijwe baba 12, hanyuma hatoranywa 5 bakomeje mu cyiciro cya nyuma. Irushanwa ryamaze ibyumweru bitatu, abaryitabiriye bazenguruka igihugu bitabira imyitozo n’ibindi bikorwa binyuranye.

Ikigo gitegura iri rushanwa (Miss Universe Organization) cyabonye ubuyobozi bushya nyuma y’uko Umunya-Thailand, Anne Jakkaphong Jakrajutatip, yegujwe, agasimburwa na Mario Búcaro wo muri Guatemala mu mpera z’Ukwakira. Jakkaphong yari yaguze iki kigo muri 2022, ariko kompanyi ye iza kugwa mu gihombo mu 2023.

Miss Universe igamije guhuriza hamwe abakobwa baturutse impande z’isi zinyuranye mu rwego rwo guteza imbere ubwiza mu buryo burenze isura, harimo ubwenge, impano, no gushishikariza ubumwe, ubufatanye, no gukemura ibibazo by’isi biciye mu rukundo n’ubumuntu.