Umunyamakuru yasabye Perezida Museveni kugira Jenerali Muhoozi Umuyobozi Mukuru wa Uganda Airlines
Umunyamakuru w’icyamamare Andrew Mwenda yatangije impaka zikomeye ku mbuga nkoranyambaga nyuma yo gutangaza ko Perezida Yoweri Kaguta Museveni akwiye gushyiraho Jenerali Muhoozi Kainerugaba nk’Umuyobozi Mukuru (CEO) wa Uganda Airlines.
Ibi Mwenda yabivuze mu kiganiro cyanyuze kuri Televiziyo UBC, aho yagaragaje ko Uganda Airlines ishobora gukora neza gusa iyobowe n’umuntu wo mu muryango wa Perezida, cyane cyane Muhoozi, kuko ari we ushobora kugera kuri Perezida bitagoranye kandi akamugiraho ijambo.
Mwenda yavuze ko ubuyobozi buturuka mu muryango wa mbere bwakuraho ubukererwe buterwa n’inzego zinyuranye zibera mu biro gusa, bigatuma ibyemezo bifatwa vuba.
Yagize ati: “Niba Uganda ishaka kuyobora mu bijyanye na sosiyete y’indege, byasaba ko Museveni ashyiraho Muhoozi nka CEO, cyangwa undi wo mu muryango we ushobora kumugeraho byoroshye. Ubundi buryo ni ugushaka abanyamwuga b’abanyamahanga”.
Aya magambo yahise akurura impaka zikomeye ku mbuga nkoranyambaga, aho Abanya-Uganda bamwe bibajije ku kuri n’ishingiro ry’iki gitekerezo, mu gihe abandi bemera ko kuba hafi y’ubutegetsi bishobora gufasha sosiyete y’indege y’igihugu gukora neza kurushaho.
Ibi Mwenda yabivuze mu gihe Perezida Museveni bivugwa ko ari gushaka Umuyobozi Mukuru mushya wa Uganda Airlines nyuma yo kwirukana Jennifer Bamuturaki mu ntangiriro z’uku kwezi. Hari kandi amakuru ataremezwa avuga ko Perezida ashobora no gutekereza ku guha izi nshingano uwahoze ari Umuyobozi Mukuru wa Ethiopian Airlines, mu rwego rwo kuzahura iyi sosiyete y’indege iri mu bibazo.
