Umusirikare w’Uburusiya yakatiwe igifungo cya burundu muri Ukraine
Urukiko rwo muri Ukraine rwakatiye igifungo cya burundu umusirikare w’Uburusiya, Dmitry Kurashov w’imyaka 27, nyuma yo guhamwa n’icyaha cyo kwica ku bushake umusirikare wa Ukraine wari ufashwe nk’imfungwa y’intambara, witwa Vitalii Hodniuk, wari ufite imyaka 41.
Nk’uko inzego z’umutekano za Ukraine zabitangaje, ubuhamya bw’ababibonye, raporo z’inzobere n’amashusho yafashwe byemeje ko Kurashov yarashe Hodniuk akoresheje imbunda yo mu bwoko bwa AK-47, ubwo yari amaze kwishyikiriza ingabo z’Uburusiya adafite intwaro, ibyo bikaba ari ukurenga ku mategeko agenga intambara.
Ibyaha byabaye ku itariki ya 6 Mutarama 2024, ubwo umutwe wa gisirikare Kurashov yarimo wagabaga igitero ku birindiro bya Ukraine mu karere ka Zaporizhzhia. Nyuma yo gukora ubwo bwicanyi, Kurashov n’abo bari kumwe baratsinzwe maze bafatwa nk’imfungwa z’intambara.
Mu rubanza rwamaze amezi menshi, Kurashov yabanje kwemera icyaha ariko nyuma akivuguruza, avuga ko yari yabikoze kugira ngo urubanza rusozwe vuba, yizera ko azarekurwa mu gihe cy’ivuguruzanya ry’imfungwa. Yagerageje no kuvuga ko ari undi musirikare w’Uburusiya warashe Hodniuk, ariko ubuhamya bw’abandi basirikare bafashwe bwemeje ko ari we wakoze ubwo bwicanyi.
Abasirikare batatu b’Uburusiya babwiye urukiko ko babonye Vitalii Hodniuk, umusirikare wa Ukraine, asohoka mu mwobo adafite intwaro kandi yamanitse amaboko nyuma yo gusabwa kwishyikiriza ingabo z’Uburusiya na Dmitry Kurashov. Nubwo batabonye aho yarasiwe kubera ibiturika byari bihari, bose bavuze ko muri ako gace hari hasigaye Kurashov wenyine, bityo bigahamywa ko ari we wamwishe.
Kurashov ntiyigeze atanga ubuhamya mu rukiko, ariko umwunganizi we yavuze ko yicujije kandi ko yakoze ibyo ku itegeko yahawe n’abamukuriye. Ubushinjacyaha bwo bwagaragaje ko atigeze yerekana kwicuza na guke kwitaho ubuzima bwa muntu.
Kurashov, wari warakatiwe igifungo mu Burusiya azira ubujura, yinjiriye mu gisirikare cy’Uburusiya mu mutwe wa Storm V kugira ngo afungurwe, nk’uko byakorwaga ku mfungwa zemeraga kujya kurwana muri Ukraine. Uwo mutwe uzwiho koherezwa ku mirongo y’imbere no gukora ibikorwa by’ubugome.
Kuva intambara yatangira mu 2022, Ukraine ivuga ko abasirikare barenga 150 bayo bari imfungwa biciwe n’ingabo z’Uburusiya. Ubushinjacyaha bwa Ukraine buvuga ko ubwo bwicanyi bukorwa mu buryo bugaragaza ko ari gahunda, naho ibirego bireba ingabo za Ukraine byo bikaba bike cyane ugereranyije n’iby’Uburusiya.
