Umwami wa Qatar yageze i Kigali yakirwa na Perezida Kagame
Ku gicamunsi cyo kuri uyu wa Kane tariki ya 20 Ugushyingo, 2025, Perezida Paul Kagame yakiriye Umwami wa Qatar, Sheikh Tamim bin Hamad Al Thani ku Kibuga cy’Indege Mpuzamahanga cya Kigali, mu ruzinduko ajemo mu Rwanda.
Akimara kumwakira, Perezida Kagame ni we ubwe witwariye Umwami wa Qatar mu modoka berekeza ku biro by’umukuru w’Igihugu.
Nk’uko Ibiro by’umukuru w’Igihugu byanditse ku rubuga rwa X, bavuze ko aba bayobozi bombi bagiranye ibiganiro byihariye mbere y’uko Perezida Kagame ajya gutembereza uyu Mwami wa Qatar, urwuri rwe ruherereye i Kibugabuga mu Karere ka Bugesera, mu burasirazuba bw’u Rwanda.
Uru ruzinduko rw’Umwami wa Qatar mu Rwanda rugamije kwerekana ubufatanye bukomeye kandi bugamije guteza imbere imikoranire mu nzego nyinshi, no gukomeza gushyigikira amahoro n’iterambere mu karere.
U Rwanda na Qatar bifitanye umubano ukomeye mu by’ubukungu, ibikorwaremezo, ikoranabuhanga n’indege. U Rwanda na Qatar bashyizeho amasezerano y’ishoramari, ubucuruzi, ikoranabuhanga ndetse no mu bijyanye n’indege. Sosiyete y’Indege ya Qatar Airways ifite imigabane mu mushinga w’Ikibuga cy’Indege Mpuzamahanga cya Bugesera, banafatanya mu bijyanye n’ubuhinzi, ikoranabuhanga, umutekano, ubwikorezi na serivisi z’imari.
Perezida Kagame yakiriye Umwami wa Qatar ku Kibuga cy’Indege Mpuzamahanga cya Kigali
Perezida Kagame ni we ubwe witwariye Umwami wa Qatar mu modoka bava ku kibuga cy’indege
