Uwakoraga ubusambanyi bwo kuri interineti yakatiwe burundu
Umuyobozi w’itsinda ry’abakora ubusambanyi bwo kuri interineti hifashishijwe urubuga nkoranyambaga Telegram, ryakoragwa mu gusakaza ibihumbi by’amashusho y’ibikorwa by’imibonano mpuzabitsina, Kim Nok-wan, w’imyaka 33, yahanishijwe igifungo cya burundu muri Koreya y’Epfo.
Kim yayoboye itsinda ryitwaga Vigilantes, riyobowe nk’urukuta rwa “pyramide”, aho abayobozi bo hejuru bungukira ku banyamuryango bashya binjiye, abagize iri tsinda bashukaga abantu bakabashyiraho igitutu kugira ngo bakore kandi basangize abandi amashusho y’ubusambanyi hifashishijwe interineti.
Hagati ya Gicurasi 2020 na Mutarama 2025, iri tsinda ryahohoteye byibura abantu 261, rikaba ari ryo rifite umubare munini w’abahohoterwa ku mbuga za interineti mu mateka ya Koreya y’Epfo.
Uyu wari warihimbye izina rya “Pastor”, Kim, yagaragaye mu mategeko nk’uwakoze ibyaha by’imibonano mpuzabitsina ku bana ndetse n’isakazwa ry’amashusho agaragaza ihohoterwa rikorerwa abana.
Yahanishijwe igifungo cya burundu nyuma yo kuregwa ibyaha birimo gushyiraho no kuyobora umutwe w’ubugizi bwa nabi, gukora no gukwirakwiza amashusho y’ihohoterwa ndetse no kuyafata mu buryo butemewe, gushyira abantu mu bikorwa byo gukoresha ayo mashusho mu buryo butemewe, gukora ihohoterwa ry’imibonano mpuzabitsina aho uwahohotewe atashoboraga kwirwanaho.
Urukiko rwavuze ko Kim yavuze ko yicuza, ariko rwemeza ko yakoze ibyaha byinshi mu myaka ine kugeza kuri itanu ishize. Urukiko rwemeje ko kubera ubugome bw’ibyaha bye n’uburyo abahohotewe batishyurwa bihagije, ari ngombwa kumwikiza burundu mu muryango.
Abapolisi bavuze ko Kim yashakaga abagabo n’abagore ku mbuga nkoranyambaga, ababwira ko bazafashwa nibemera gukora cyangwa gusakaza amashusho, hanyuma akabahohotera abashukisha gutanga amakuru ya bo mu nzego z’umutekano.
Bamwe muri aba bantu bashyizwe muri pyramide ya Vigilantes, bahawe imyanya y’ababwiriza n’abadiyakoni kugira ngo bazane abandi bahohoterwa. Kim yategetse ko abantu bakuru n’abana ko bagomba gutanga raporo buri saha no kwandika ibaruwa y’icyicu, abananiwe kubikora akabahanisha gufata amafoto ya bo bambaye ubusa bakisebya.
Polisi itangaza ko itsinda rya Vigilantes ryakoze amashusho arenga 2,000. Kim kandi yihaye uburenganzira bwo guhonyora abagore 10 bakiri bato, guhatira abagore gukora imibonano mpuzabitsina n’abandi bagabo, ndetse bakifata amashusho bari muri ibyo bikorwa ku buryo byabasigiye ibikomere..
Kim yagaragaye kandi ko yagize uruhare rwa sheni 453 za Telegram n’ibiganiro byo kuri interineti mu rwego rwo gukora ibyaha, harimo 60 yayoboye ubwe.
Iki ni igihe cya mbere Telegram ifatanyije n’abapolisi ba Koreya y’Epfo, itanga amakuru yatumye hakorwa iperereza ryimbitse rigeraho gufata Kim. Polisi y’Igihugu ya Koreya yashyizeho uburyo bwo gukorana na Telegram mu Kuboza 2024, iyemerera gutanga amakuru yemewe ajyanye n’iperereza ku butegetsi.
