Uwase Vanessa Raissa, wabaye Igisonga cya Mbere cya Miss Rwanda 2015, yasabye ababyeyi kwigisha abakobwa babo kwirinda bakiri bato mu kumenya imikino njyarugamba, anenga ibitekerezo bibi byandikwa ku nkuru zimuvugaho mu bitangazamakuru byo kuri murandasi.
Mu butumwa bwo mu rurimi rw’Icyongereza, yashyize kuri Instagram, Vanessa yavuze ko ahangayikishijwe n’umutekano w’abakobwa, asaba ababyeyi kubigisha uburyo bwo kwirinda, harimo no kubashyira mu myitozo njyarugamba irimo karate na kung-fu. Yagize ati: “Niba ufite umukobwa muri iyi si irimo ibyago, icyo wakora ubu kugira ngo umurinde ni ukumwigisha kwirinda akiri muto. Mushyire mu myitozo njyarugamba y’ubwoko bwose”.
Yakomeje avuga ko isi irimo abagabo ari isi iteje akaga. Bityo, asaba ko bigisha abakobwa uko bakwirinda abo agereranya n’inyamaswa.
Vanessa yavuze ko abakobwa bashobora guhura n’akaga gaturutse no ku bagabo basanzwe bazi cyangwa bafitanye isano. Mu butumwa bwe, yavuze ko nta mubyeyi ukwiye gutegereza ko ikibazo kiba ku mwana we ngo abone gutekereza ku buryo bwo kumurinda. Yagereranyije abagabo n’inyamaswa, avuga ko yumva ari ngombwa ko abakobwa bigishwa kwirinda. Ibyo ni ibitekerezo bye, ntibikwiye gufatwa nk’aho buri mugabo ateza akaga.
Ati: “Ntushobora gutekereza ko hari icyagera ku mukobwa wawe kugeza igihe kimubayeho. Nta mutekano aba afite ari kumwe n’umugabo, yaba musaza we, se, nyirarume, mubyara we cyangwa inshuti y’umuryango. Umugabo ni umugabo, kandi abo ngereranya n’inyamaswa batandukanye natwe abagore. Umunsi uzabyumva nk’umugore, ni bwo uzashobora kurinda abakobwa bawe. Ndabasabye, mubashyire mu myitozo njyarugamba. Tubyigishe uko bakwirinda no gukomera kurusha abagabo”.
Mu bundi butumwa, Vanessa yagarutse ku bitekerezo bibi abona munsi y’inkuru zimuvugaho. Yavuze ko, uko abibona, hafi 99% byabyo byandikwa n’abagabo, nubwo atagaragaje imibare yagenzuwe yemeza icyo kigereranyo.
Yanenze kandi abakobwa n’abagore bifatanya n’abandi kumwandikaho amagambo mabi, abita “pick me”, imvugo yakoresheje avuga abagore ashaka ko banenga bagenzi babo kugira ngo bashimwe n’abagabo.
Uwase Vanessa Raissa yabaye Igisonga cya Mbere mu irushanwa rya Miss Rwanda 2015, ryegukanywe na Kundwa Doriane.
Ibitekerezo