Umunyamakuru Niyigaba Clement agiye gufungwa iminsi 30 y’agateganyo
Urukiko rw’Ibanze rwa Gasabo rwanzuye ko Umunyamakuru Niyigaba Clement afungwa iminsi 30 y’agateganyo ni umwanzuro rwasomye kuri uyu wa 30 Mata 2026 rwanzura ko ibyagezweho bihagije kugirango akurikiranywe ari mu igororero.
Urukiko rw’Ibanze rwa Gasabo rwasomye umwanzuro w’urubanza Ubushinjacyaha bukurikiranyeho Niyigaba Clement alias DC Clement,ibyaha bine:
Gukubita cyangwa kugirira urugomo abayobozi mu nzego za Leta,Kwangiza cyangwa konona ikintu cy’undi,Kurwanya ububasha bw’amategeko,Guteza imvururu cyangwa imidugararo muri rubanda.
Urukiko rero rwashingiye ku byo Niyigaba Clement yasakaje ku mbuga nkoranyambaga ndetse akaba yarabyiyemereye imbere y’Urukiko.
Urukiko rusanga hari impamvu zikomeye zituma akekwaho ibyo byaha akurikiranweho.
Yabwiwe gusenya arinangira. Ibyo rero Urukiko rusanga yararenze ku byo yategetswe n’ubuyobozi.
Niyigaba Clement n’abunganizi be bahakanye ko atasuzuguye amategeko.
Icyaha cyo Konona imodoka y’umurenge, Urukiko rusanga hari impamvu zikomeye zituma agikurikiranwaho.
Icyaha cyo gukubita abayobozi bo mu nzego za Leta, Urukiko rwashingiye ku batangabuhamya n’ibyo Niyigaba Clement yiyemereye kandi bigize icyaha. Izo mpamvu rero zirakomeye.
Urukiko rusanga Niyigaba Clement ibyaha akekwaho byarateje ingaruka.
Urukiko rusanga agomba gukurikiranwa afunzwe by’agateganyo ndetse afite iminsi 30 yo kujuririra icyo cyemezo.
Ingingo ya 204 y’Itegeko n°68/2018 ryo ku wa 30/08/2018 riteganya ibyaha n’ibihano muri rusange ihana “umuntu wese, mu ruhame, ukoresha imvugo, inyandiko z’ubwoko bwose, amashusho cyangwa ibimenyetso by’amoko yose, bimanitswe, bitanzwe, biguzwe cyangwa bigurishijwe cyangwa bitangajwe mu bundi buryo bwose, uwangisha rubanda ubutegetsi buriho, utera imvururu mu baturage ashaka ko basubiranamo cyangwa utera rubanda intugunda ashaka kubyutsa imidugararo muri Repubulika y’u Rwanda”.
Ingingo ya 186 y’Itegeko n°68/2018 ryo ku wa 30/08/2018 riteganya ibyaha n’ibihano muri rusange ihana “umuntu wese ku bw’inabi, wangiza cyangwa wonona ikintu cy’undi cyimukanwa cyangwa kitimukanwa.”
Ingingo ya 205 y’Itegeko n°68/2018 ryo ku wa 30/08/2018 riteganya ibyaha n’ibihano muri rusange ihana “umuntu wese ushishikariza abandi kwigomeka kubyo amategeko ateganya”.
Ingingo ya 234: ihana Umuntu wese ukubita cyangwa ugirira urugomo urwo ari rwo rwose umwe mu bagize Inteko Ishinga Amategeko, ugize Guverinoma, ushinzwe umutekano wa Leta cyangwa undi muyobozi, mu gihe akora umurimo ashinzwe cyangwa ari wo biturutseho, aba akoze icyaha.
