Inteko Ishinga Amategeko y’Amerika, umutwe w’Abadepite, yemeje umushinga w’itegeko ugamije kongera inkunga ihabwa Ukraine no gukaza ibihano bifatirwa Uburusiya. Icyatunguranye ni uko bamwe mu badepite bo mu ishyaka ry’Abarepubulikani bahisemo gutora batandukanye n’umurongo wa Perezida Donald Trump n’ubuyobozi bw’ishyaka rya bo.
Ku wa Kane w’ejo hashize, Abarepubulikani 18 bifatanyije n’Abademokarate batora bashyigikira umushinga wiswe “Ukraine Support Act”, watowe n’amajwi 226 awushyigikiye mu gihe 195 bawuteye utwatsi. Ibi byongeye kugaragaza ukutumvikana gukomeje kwiyongera hagati ya bamwe mu Badepite b’Abarepubulikani na Trump ku bijyanye na politiki mpuzamahanga.
Nubwo uyu mushinga w’itegeko wemejwe n’Umutwe w’Abadepite, biracyari kure ko uba itegeko kuko ugomba kubanza kwemezwa na Sena mbere yo gushyirwaho umukono na Perezida Trump. Mu minsi ishize kandi, bamwe mu Badepite b’Abarepubulikani bari banashyigikiye undi mwanzuro washakaga kubuza Trump gufata izindi ngamba za gisirikare muri Iran.
Uyu mushinga uteganya ko Ukraine yahabwa indi nkunga irenga miliyari imwe y’amadolari y’Amerika yo gufasha mu mutekano no mu bikorwa byo kongera kubaka igihugu. Uteganya kandi gutanga uburenganzira bwo gukoresha inguzanyo ya miliyari umunani z’amadolari azifashishwa mu bikorwa bya gisirikare bya Ukraine.
Ibitekerezo