Umudepitekazi Ilhan Omar wo mu Ishyaka ry’Abademokarate muri Amerika yamaganye isakwa ryakorewe mu rugo rwe i Washington, D.C., avuga ko ari igikorwa cyo kumutera ubwoba no gukoresha inzego za leta mu kwibasira abatavuga rumwe na Perezida Donald Trump.
Urugo rw’uyu mudepitekazi uhagarariye agace ko muri Leta ya Minnesota rwasatswe mugitondo cyo ku wa Mbere w’ejo hashize, tariki ya 12 Ukwakira 2026, habura ibyumweru hafi bitatu ngo habe amatora yo ku wa 3 Ugushyingo. Omar na we ari kwiyamamariza kongera gutorwa.
Minisiteri y’Ubutabera y’Amerika yatangaje ko abakozi b’ishami rishinzwe iperereza muri Minisiteri y’Umutekano w’Igihugu, HSI, basatse urwo rugo bafite icyemezo cy’urukiko. Yasobanuye ko iki gikorwa kiri mu iperereza ry’ibyaha rikomeje, ariko ntiyatangaza ibisobanuro birambuye ku byo rikurikirana.
Amakuru yatanzwe n’abantu bazi iby’iryo perereza avuga ko rifitanye isano n’inyandiko Omar yakoresheje mu kwimukira muri Amerika. Uyu mudepitekazi ukomoka muri Somalia asanzwe ahakana ibirego by’uburiganya mu bijyanye n’abinjira n’abasohoka.
Mu butumwa yashyize ku rubuga rwa X rwahoze rwitwa Twitter, Omar yavuze ko Trump amaze imyaka amwibasira akoresheje ibirego avuga ko bidafite ishingiro n’ibikorwa byo kumusebya. Yashimangiye ko isakwa ry’urugo rwe ari ikindi gikorwa cyo kumushyiraho igitutu, ati: “Sinzacecekeshwa.”
Trump yahakanye ko yagize uruhare muri iryo sakwa, avuga ko ari ikibazo gikurikiranwa na Minisiteri y’Ubutabera. Icyakora, yongeye kunenga Omar, avuga ko amufata nk’umuntu w’inkundamugayo.
Abayobozi b’Abademokarate mu Nteko Ishinga Amategeko na bo bamaganye iki gikorwa. Bavuze ko igihe cyakorewe, amatora yegereje, gitera impungenge ku ikoreshwa ry’ububasha bwa leta mu kwibasira abatavuga rumwe na Trump.
Ibi byatumye hongera kuvugwa imikorere ya Minisiteri y’Ubutabera, isanzwe isaba abashinjacyaha kwitondera ibikorwa by’iperereza bigaragara mu ruhame mbere y’amatora, kugira ngo bitagaragara nk’ibigamije gufasha cyangwa kubangamira umukandida.
Ilhan Omar yageze muri Amerika akiri umwana w’impunzi, nyuma yo guhunga intambara yo muri Somalia. Yatowe bwa mbere mu Nteko Ishinga Amategeko mu 2018, aba umwe mu bagore ba mbere b’Abayisilamu bayinjiyemo. Ni umwe kandi mu bagize itsinda ry’abadepite bazwi nka “The Squad”, rikunze kunenga politiki za Trump.
Ibitekerezo