Ishyaka ritavuga rumwe n’ubutegetsi bw’u Burundi, Sahwanya–FRODEBU, ryatangaje ko ritazatanga umukandida mu matora ya perezida ateganyijwe muri Gicurasi 2027.
Impamvu yo kudatanga umukandida, iri shyaka rivuga ko imyiteguro yayo irimo inenge nyinshi zituma ritizera ko azatandukana n’amatora yo mu 2025.
Iki cyemezo cyafatiwe mu nama nkuru y’ishyaka yabereye i Bujumbura ku wa Gatandatu. Abayitabiriye basuzumye ingingo zitandukanye, zirimo no kureba uwahagararira FRODEBU muri ayo matora.
Mu itangazo ryayo, FRODEBU yavuze ko nyuma yo gusuzuma uko amatora arimo gutegurwa, yasanze hari ibibazo byinshi bishobora gutuma ibizayavamo bisa n’ibyavuye mu matora yabanje. Iri shyaka rishinja ayo matora kutategurwa mu mucyo no kurangwa n’uburiganya.
Mu matora yo mu 2025 y’abadepite, abasenateri n’abayobozi b’inzego z’ibanze, ishyaka CNDD–FDD riri ku butegetsi ryegukanye amajwi hafi 100%. Kugeza ubu, nta rindi shyaka rifite abarihagarariye mu mitwe yombi y’Inteko Ishinga Amategeko y’u Burundi.
Muri Mata uyu mwaka, CNDD–FDD yemeje ko Perezida Évariste Ndayishimiye azongera kuyihagararira mu matora ya perezida yo mu 2027.
Komisiyo y’Igihugu y’Amatora mu Burundi, CENI, yo yavuze ko itumva impamvu FRODEBU inenga amatora ataraba.
Umwe mu bagize CENI, François Bizimana, yabwiye BBC Gahuzamiryango ko iryo shyaka ryagakwiye kwitabira inama ihuza amashyaka yose 37, iteganyijwe ku wa Gatanu w’iki cyumweru, rikayigaragarizamo ibyo ryifuza ko bikosorwa.
Bizimana yavuze ko iyo nama izasobanura aho imyiteguro y’amatora igeze n’ibizasabwa abakandida. Yongeyeho ko nta kibazo kizabuzwa kuganirwaho, kandi ko amashyaka afite ibyo anenga ku matora yabanje azahabwa umwanya wo kubivuga.
FRODEBU ivuga ko aho gutanga umukandida, izakomeza guharanira ubutegetsi bushingiye kuri demokarasi y’amashyaka menshi n’amatora ategurwa neza, mu mucyo, kandi ibiyavuyemo bikemerwa na bose.
Iri shyaka ryemeza ko ibiganiro ryagiye rigirana n’ubutegetsi, Minisiteri y’Ubutegetsi bw’Igihugu na CENI bitagize icyo bitanga cyariha icyizere cy’uko ibibazo ryagaragaje bizakosorwa.
Ishyaka Sahwanya–FRODEBU ryashinzwe mu buryo bwemewe n’amategeko mu 1992 na Melchior Ndadaye, wabaye Perezida wa mbere w’u Burundi watowe mu buryo bwa demokarasi mu 1993.
Ibitekerezo