DRC: Ingendo hagati ya Uvira na Bukavu zirabujijwe
Ingendo hagati y’imijyi ya Bukavu na Uvira yo mu Ntara ya Kivu y’Epfo zongeye guhagarikwa guhera ku itariki ya 11 Gicurasi, nyuma y’igihe kingana n’ukwezi kimwe zari zarasubukuwe. Ibi byatangajwe n’umuyobozi w’inzibacyuho w’iyo ntara, Jean-Jacques Elakano.
Kwamamaza iki cyemezo byakozwe mu rwego rwo gukumira urujya n’uruza hagati y’uturere tugenzurwa na leta n’uducungwa n’umutwe wa AFC/M23, nk’uko Radio RFI yabitangaje.
Elakano yavuze ko ubuyobozi bufite impungenge ko abarwanyi ba M23 bashobora gukoresha iyo mihanda mu buryo bwo kwinjira rwihishwa mu bice bikiri mu maboko ya leta.
Uyu muhanda wari warafunzwe bwa mbere muri Werurwe, nyuma y’uko M23 yari yegereje umujyi wa Uvira. Icyakora nyuma yaho warongeye gufungurwa mbere y’uko wongera guhagarikwa.
Ibi bibaye mu gihe amakuru avuga ko mu mpera z’icyumweru gishize abarwanyi ba M23 bavuye mu duce twa Sange, Luvungi, Luberizi, Kabunambo n’ahandi hantu haherereye nko mu bilometero 40 mu majyaruguru ya Uvira.
Mu kindi cyagarutsweho, Jean-Jacques Elakano yanenze bamwe mu bayobozi bakorera i Uvira bavuga ko barara mu mujyi wa Bujumbura mu Burundi, bakagaruka gukora akazi i Uvira ku manywa. Yabasabye kujya baba mu mujyi bayobora aho gukomeza gukorera kure ya wo.
