Vital Kamerhe, wahoze ayobora Inteko Ishinga Amategeko ya Repubulika Iharanira Demokarasi ya Congo (RDC), yanenze Joseph Kabila ku cyemezo cyo kuyobora ihuriro rya politiki na gisirikare rya FRN, avuga ko kinyuranye n’amagambo ye yo guharanira amahoro.
Mu butumwa yashyize ku rubuga rwa X mugitondo cyo kuri uyu wa Gatatu tariki ya 14/10/2026, Kamerhe, usanzwe ari umwe mu banyapolitiki ba hafi ya Perezida Félix Tshisekedi, yavuze ko umuntu adashobora gusaba amahoro ari na ko yifatanya n’umutwe witwaje intwaro. Yongeyeho ko Kabila akwiye kubazwa ibyo yakoze mu myaka 18 yamaze ayobora igihugu cya RDC.
Kamerhe yashimangiye ko ashyigikiye Tshisekedi, asaba Abanye-Congo kwimakaza ubumwe n’ibiganiro, bakamagana gukoresha imitwe yitwaje intwaro mu gushaka ubutegetsi. Yavuze ko amahoro, ubumwe n’ubusugire bw’igihugu bigomba kuza imbere y’inyungu za politiki.
Aya magambo yayatangaje nyuma y’iminsi ibiri Kabila agizwe umuyobozi wa Front pour la Refondation de la Nation (FRN), ihuriro ryatangirijwe i Goma mu burasirazuba bwa RDC ku wa Mbere w’iki cyumweru.
FRN ivuga ko igamije gukuraho ubutegetsi buriho ikoresheje uburyo bwose bushoboka, harimo n’ingufu. Itangizwa ryayo ryagaragaje ku mugaragaro ubufatanye bwa Kabila n’umutwe witwaje intwaro ukorana n’inyeshyamba za M23.
Ku wa Kabiri w’ejo hashize, Perezida wa Sena, Jean-Michel Sama Lukonde, na we yanenze Kabila, amushinja kuyobora ihuriro rya politiki na gisirikare. Yavuze ko icyo cyemezo gishimangira ibyo Tshisekedi yari amaze igihe avuga, ashinja Kabila kuba inyuma y’inyeshyamba zirwanya ubutegetsi bwe.
Sama Lukonde yavuze ko Tshisekedi aharanira kugarura amahoro arambye, mu gihe, ku bwe, ibikorwa bya Kabila bibangamira inyungu z’Abanye-Congo.
Hagati aho, akanama k’igihugu gakurikirana iyubahirizwa ry’amasezerano n’ibikorwa by’amatora, CNSA, kasabye impande zose kwifata no kwemera ibiganiro.
Mu itangazo kasohoye ku wa Kabiri w’ejo hashize, ako kanama kavuze ko RDC iri imbere y’amahitamo hagati y’amahoro n’intambara, ndetse n’ubumwe no gucikamo ibice. Kasabye kwirinda urugomo, gutangiza ibiganiro by’igihugu bidaheza no gushyira inyungu z’igihugu imbere y’iza politiki.
Nubwo Kamerhe na Sama Lukonde bagize icyo bavuga, Guverinoma n’ibiro bya Perezida wa RDC ntibyari byasohoye itangazo ryihariye ku iyemezwa rya Kabila nk’umuyobozi wa FRN. Kabila na we ntiyari yagize icyo atangaza ku kunengwa n’abo banyapolitiki.
Ibitekerezo