Ibyitezwe mu myitozo izahuriramo ingabo z’u Rwanda, u Burundi na Uganda
Ubuyobozi bw’Umuryango wa Afurika y’Iburasirazuba (EAC) bwatangije ku mugaragaro imyitozo ya gisirikare izwi ku izina rya USHIRIKIANO IMARA, igamije kongera ubushobozi bw’ingabo z’ibihugu bigize uyu muryango mu guhangana n’ibibazo by’umutekano.
Iyi myitozo yahuje ingabo z’u Rwanda, u Burundi, Uganda, Kenya na Tanzania, mu gihe Somalia yitabiriye nk’indorerezi. Iyi gahunda ibaye ku nshuro ya 14, ikaba igamije gufasha ibi bihugu kurushaho gukorera hamwe mu kurwanya iterabwoba, ubushimusi bwo mu nyanja ndetse n’ibindi byaha byambukiranya imipaka.
Igikorwa cyo kuyitangiza cyabereye mu cyanya cy’imikino Ulinzi, Langata i Nairobi muri Kenya, kiyoborwa n’Umunyamabanga Mukuru Wungirije wa EAC, Andrea Aguer Ariik Malueth, afatanyije n’Umugaba Mukuru Wungirije w’Ingabo za Kenya, Lt Gen John Mugaravai Omenda. Uyu muhango witabiriwe n’abandi bayobozi bakuru barimo Ambasaderi w’u Rwanda muri Kenya, Ernest Rwamucyo.
Mu ijambo rye, Lt Gen Omenda yavuze ko iyi myitozo igamije kongera ubushobozi bw’ingabo mu guhangana n’ibibazo by’umutekano bikomeje kugaragara mu karere. Yagaragaje ko iterabwoba, ubujura bwo mu nyanja n’ibiza biri mu bibazo bikwiye gufatirwa ingamba zihuriweho n’ibihugu.
Iyi myitozo yatangiye ku wa 6 Gicurasi 2026, iteganijwe kurangira ku wa 28 Gicurasi 2026, ikaba irimo abasirikare 342 baturutse mu bihugu bitandukanye bya EAC.
Biteganyijwe ko izafasha kurushaho kunoza ubufatanye hagati y’ingabo z’akarere, kongera imyiteguro yo guhangana n’ibibazo bishobora guhungabanya umutekano w’abaturage n’iterambere ry’akarere muri rusange.
