Urukiko rw’Ibanze rwa Kicukiro rwasubitse isomwa ry’ urubanza ruregwamo umuhanzi Yampano, kubera ikibazo cy’ikoranabuhanga (NetWork).
Ni Urubanza rwari gusomwa kuri uyu wa Gatanu tariki 05 Kamena 2026 ku mwanzuro w’ ifungwa n’ifungurwa ry’agateganyo.
Umucamanza wari gusoma uru rubanza yavuze ko bitewe n’ibibazo bya sisiteme batabasha gusoma imyanzuro y’urubanza, bityo rwimurirwa ku wa Kabiri tariki ya 09 Kamena 2026 saa cyenda z’amanywa.
Ubushinjacyaha bumurega ibyaha bitandatu bishingiye ku kirego cyatanzwe n’umugore we; Gukubita no gukomeretsa ku bushake, Ubwinjiracyaha ku cyaha cy’ubwicanyi, Gukoresha ibikangisho, Ifungiranwa ry’umuntu bitemewe n’amategeko, Kunywa ibiyobyabwenge no Kwangiza ikintu cy’undi.
Hagati aho Umugore wa Yampano, Uwineza Diane, yanditse ibaruwa asabira umugabo we imbabazi.
Diane agaragaza ko yifuza ko bakongera kwiyunga bakabana kuko amakimbirane yabo yari ashingiye ku bibazo by’umuryango.
Ubushinjacyaha bwo bwavuze ko amategeko atemerera umugore gutanga imbabazi ku byaha bimwe na bimwe bikomeye, bityo busaba ko afungwa iminsi 30 y’agateganyo.
Ibitekerezo