Abantu umunani batawe muri yombi bakekwaho kugira uruhare mu rugomo rwakorewe umugabo watemwe ikiganza kikavaho mu Karere ka Kamonyi.
Nk’uko bitangazwa na Polisi yo mu Ntara y’Amajyepfo, ugu mugabo wakaswe ikiganza yitwa Twibanire Emmanuel w’imyaka 39
Uru rugomo rwabaye ku wa 13 Ukwakira 2026, mu Mudugudu wa Nyenga, Akagari ka Bugoba, mu Murenge wa Rukoma w’Akarere ka Kamonyi.
Amakuru avuga ko abo bagabo basanzwe bakorana ubucukuzi bw’amabuye y’agaciro butemewe n’amategeko bari basangiye inzoga, bamara gusinda bagatangira gushyamirana bapfa amakimbirane bari basanganywe. Muri uko gushyamirana ni bwo Twibanire yatemwe ikiganza kikavaho.
Umuvugizi wa Polisi mu Ntara y’Amajyepfo, CIP Kamanzi Hassan, yabwiye IGIHE dukesha iyi nkuru ko bakimara kumenya ibyabaye, abapolisi bahise batabara, bafata abantu umunani bakekwaho kugira uruhare muri urwo rugomo.
CIP Kamanzi yavuze ko iperereza rikomeje kugira ngo hamenyekane abandi bashobora kuba baragize uruhare muri ubwo bugizi bwa nabi, ndetse no mu bucukuzi bw’amabuye y’agaciro bukorwa mu buryo bwa magendu.
Abafashwe bafungiye kuri Sitasiyo ya Polisi ya Rukoma, mu gihe Twibanire ari kwitabwaho n’abaganga mu Bitaro bya Remera Rukoma.
Polisi yasabye abaturage kwirinda urugomo n’ibindi bikorwa binyuranyije n’amategeko, kuko bishobora guteza ibikomere, gutwara ubuzima no guhungabanya umutekano.
Yanabashishikarije gukomeza gukorana n’inzego z’umutekano, batangira amakuru ku gihe ku bikorwa bishobora guteza umutekano muke aho batuye. Yibukije ko gutanga ayo makuru atari ukuregana, ahubwo ari inshingano ya buri muturage mu kurinda umutekano w’abantu n’ibintu muri rusange.
Ibitekerezo