Umuyobozi mukuru w’urwego rw’ubutasi rwa Ecuador, Michele Sensi-Contugi, n’umugore we Stephany Hollihan Vasconez, bari mu bantu barindwi bapfiriye mu mpanuka ya kajugujugu yari itwaye ba mukerarugendo mu Majyaruguru ya Kenya.
Iyi mpanuka yabaye ku wa Gatatu, tariki ya 19 Kanama 2026, ahagana saa tatu n’iminota 13 za mugitondo ku isaha ya Kenya—ni ukuvuga saa mbili n’iminota 13 ku isaha y’u Rwanda—hafi y’Umusozi wa Ololokwe mu Karere ka Samburu.
Ikigo cya Kenya gishinzwe iby’indege za gisivili, KCAA, cyatangaje ko iyo kajugujugu yo mu bwoko bwa Eurocopter EC130 B4 yari itwaye abagenzi batandatu n’umupilote. Bose bahise bapfa.
Yari mu rugendo rwihariye rwateguwe ku ba mukerarugendo, iva mu gace kabungabunga inyamaswa ka Loisaba yerekeza mu gace k’uruzi rwa Ewaso Nyiro. Kajugujugu yari iya sosiyete Lady Lori Helicopters, mu gihe abagenzi bari abakiriya b’ikigo cy’ubukerarugendo muri Kenya.
Amashusho yashyizwe ahagaragara n’umuryango wa Croix-Rouge wa Kenya yagaragaje umwotsi mwinshi uzamuka mu gace k’imisozi n’amashyamba, abakozi b’ubutabazi bagerageza kugera ku bisigazwa bya kajugujugu byari bigikongoka. Imiterere igoye y’aho impanuka yabereye hamwe n’umuriro byadindije ibikorwa byo gushakisha no gukura imibiri mu bisigazwa bya yo.
Minisiteri y’Ububanyi n’Amahanga ya Leta Zunze Ubumwe z’Amerika yemeje ko batanu mu bapfuye bari bafite ubwenegihugu bw’Amerika. Ambasade y’Amerika muri Kenya yatangaje ko iri gukorana n’inzego za ho no gufasha imiryango y’ababuze aba bo. Stephany Hollihan yari afite ubwenegihugu bwa Ecuador n’ubw’Amerika.
Mu bandi bapfiriye muri iyo mpanuka harimo José Alberto Suárez wari umuyobozi mukuru wa televiziyo nyinshi za Telemundo muri Leta ya Florida. Ubuyobozi bwa NBCUniversal na Telemundo bwatangaje ko bwababajwe cyane n’urupfu rwe.
Perezidansi ya Ecuador na yo yemeje urupfu rwa Sensi-Contugi n’umugore we, yihanganisha umuryango wa bo, inshuti n’abo bakoranaga. Bombi basize abana babiri.
Sensi-Contugi wari ufite imyaka 44 yavukiye mu Butaliyani ku mubyeyi w’Umutaliyani n’Umunya-Ecuador. Yabanje gukora mu bucuruzi mbere yo kwinjira muri Guverinoma ya Perezida Daniel Noboa.
Mu ntangiriro za 2024 yagizwe Umuyobozi Mukuru w’Ikigo cya Ecuador gishinzwe ubutasi, CIES. Muri Mata uwo mwaka yabaye Minisitiri w’Imiyoborere kugeza muri Kanama, nyuma asubira ku buyobozi bw’urwego rw’ubutasi. Yafatwaga nk’umwe mu bantu ba hafi kandi bizewe na Perezida Noboa.
Impamvu yateye iyi mpanuka ntiramenyekana. KCAA yatangiye iperereza rigamije kumenya icyaba cyatumye kajugujugu ihanuka, mu gihe amakuru y’abapfuye yanemejwe na Perezidansi ya Ecuador n’inzego z’Amerika.
Ibitekerezo