Mu gihe u Rwanda rwizihiza Umunsi wo Kwibohora ku nshuro ya 32, Ingabo z’u Rwanda (RDF) zashyize ahagaragara ibirango bishya by’inzego zitandukanye zazo.
Mu byahindutse, harimo ibirango n’amabendera by’inzego zigize RDF, ibimenyetso byambarwa ku maboko y’impuzankano, n’ibimenyetso by’ubuhanga bwihariye, byose bigaragaza umwihariko wa RDF, ishema ry’igihugu, ndetse n’ishusho yerekana inshingano za gisirikare.
RDF yatangaje ko ibi birango byose bigaragaza umwihariko wa RDF, ishema ry’igihugu, ndetse n’ishusho yerekana inshingano za gisirikare.
Ibi birango bishya byashyizwe ahagaragara mu rwego rwo kurushaho kugaragaza ishusho nshya, ubunyamwuga, n’inshingano za gisirikare z’inzego zigize RDF.
Hahinduwe ibirango (logos) n’amabendera bishya by’inzego zitandukanye zigize igisirikare.
Humuritswe ibimenyetso bishya byambarwa ku maboko y’impuzankano (shoulder/arm patches) z’abasirikare.
Kumurikwa kw’ibi birango byahuriranye n’Umunsi wa 32 wo Kwibohora, wizihizwa buri mwaka ku wa 4 Nyakanga, hibukwa ihagarikwa rya Jenoside yakorewe Abatutsi mu 1994 ndetse n’itangira ry’urugendo rushya rw’ubumwe, umutekano n’iterambere ry’igihugu.
Iri vugurura rije rikurikira irindi ryigeze gukorwa aho Ingabo z’u Rwanda zahinduye na zimwe mu moderi z’amapeti, aho yatangiye kwambarwa mu gituza ku mpuzankano y’akazi n’urugamba (combat uniform).
Ibi birango bishya byerekanwe bwa mbere binyuze ku mbuga nkoranyambaga n’uburyo bw’itangazamakuru rya RDF kugira ngo abanyarwanda bamenye ishusho nshya y’inzego z’umutekano zabo.
Tariki 9 Mutarama 2023 nibwo abasirikare b’u Rwanda batangiye kwambara amapeti mu gituza ku myambaro isanzwe, bitandukanye n’uko yajyaga yambarwa ku ntugu.
Ibi ariko bitandukanye ariko n’igihe bambaye impuzakano yagenewe kwambarwa mu biro cyangwa mu birori, kuko ho amapeti azakomeza kwambarwa ku ntugu.
Ni imyambarire imeze kimwe n’iy’Ingabo z’u Bwongereza cyangwa Leta Zunze Ubumwe za Amerika.
Abasesenguzi mu bya gisirikare bagaragaza ko nko mu bihe by’umutekano muke, iyo ipeti riri mu gituza bigoye ko umuntu urebera kure yapfa kumenya umusirikare ukuriye abandi ku buryo yakwibasirwa byihariye, nk’uko byagenda amapeti agaragara ku ntugu.
Uretse kuba amapeti yimuriwe mu gituza, hakozwe impinduka nto mu miterere y’amapeti ku basirikare bato, naho abakuru ni asanzwe ariko bakazajya bayambara mu gituza.
Kuri ubu RDF ikomeje kurinda umutekano w’igihugu cy’u Rwanda, kwitabira ubutumwa bw’amahoro hirya no hino ku mugabane wa Afurika no ku Isi, ndetse no gutanga umusanzu mu bikorwa by’iterambere ry’u Rwanda no mu bindi bihugu.
Ibitekerezo