“Mu gihe tutarigarurira Kivu zombi, nta matora azaba mu 2028” — Félix Tshisekedi

07 Gicurasi 2026 saa 06:20

Perezida wa Repubulika Iharanira Demokarasi ya Congo, Félix Antoine Tshisekedi, yatangaje ko mu gihe mu burasirazuba bwa RDC hakiri intambara, nta matora ya perezida azaba mu 2028.

Ibi yabitangarije mu kiganiro yagiranye n’abanyamakuru ku mugoroba wo ku wa 6 Gicurasi 2026, aho yari abajijwe ibijyanye n’amatora yaperezida ateganyijwe mu 2028 mu gihe hari ibice biri mu maboko y’umutwe w’inyeshyamba wa M23.

Yagize ati: “Mureke tubanze turangize iyi ntambara. Ariko mu gihe izaba itararangira, nta matora azaba mu 2028. Si uko nanze ko amatora aba kuko n’ingengo y’imari ya yo irahari ariko ntitwategura amatora atarimo Kivu y’Amajyepfo na Kivu y’Amajyaruguru”.

Kuri iyi ngingo yatanze urugero rw’igihugu cya Ukraine, ko kimaze imyaka irenga ibiri kidakoze amatora ya perezida kubera intambara gihanganyemo n’Uburusiya.

Ati: “Dufate urugero rwa Ukraine, hashize imyaka ibiri nta matora aba. Isi yose irabizi. Ni gute Perezida Zelenskyy yategura amatora mu gihe ari no gupanga urugamba”?

Perezida Tshisekedi yakomeje avuga ko na we adashobora gutegura amatora mu gihe ahanganye n’umwanzi.

Abajijwe ibijyanye n’uko yaba ashaka manda ya gatatu, yavuze ko nta yo ashaka ko ariko ibyo abaturage bazashaka ari byo azakora.

Ati: “Nta manda ya gatatu nshaka. Ariko nzakora ibyo abaturage bashaka”.