Papa Leo yongeye gukozanyaho na Trump mu guterana amagambo
Papa Leo yatangaje ko adatewe ubwoba n’amagambo amunenga yavuzwe na Perezida wa Leta Zunze Ubumwe z’Amerika, Donald Trump, ashimangira ko azakomeza kwamamaza inkuru nziza n’ubutumwa bw’amahoro, kandi ko kwemera kunengwa ari uburenganzira bwa buri wese.
Mu bihe bya vuba, Trump yumvikanye avuga ko Papa yaba ashyigikiye ko Iran igira intwaro za nikleyeri, nyamara Papa ntiyigeze abivuga. Icyakora, Papa Leo yagaragaje ko atemera intambara Amerika na Israel byagabye kuri Iran, ibintu byatumye Trump amugiraho icyo anenga.
Ibi bibaye mu gihe Umunyamabanga wa Leta ushinzwe ububanyi n’amahanga w’Amerika, Marco Rubio, ateganya kugirira uruzinduko rw’iminsi ibiri i Vatican muri iki cyumweru. Minisiteri y’Ububanyi n’amahanga yatangaje ko uru ruzinduko rugamije gushimangira umubano hagati y’Amerika, Ubutaliyani na Vatican, ndetse no kuganira ku bibazo by’umutekano n’inyungu bahuriyeho, cyane cyane mu Burasirazuba bwo Hagati no ku mugabane wa Amerika.
Nubwo hari abatekereza ko uru ruzinduko rufitanye isano n’ubushyamirane hagati ya Trump na Vatican, Rubio yabihakanye, avuga ko rwari rwarateguwe kera kandi ko hari byinshi by’ingenzi byo kuganirwaho na Vatican.
Ku ruhande rwe, Papa Leo yongeye gushimangira ko azakomeza guharanira amahoro n’ubwumvikane, nubwo yaba anengwa. Yavuze ko ubutumwa bw’Itorero ari ukwigisha Inkuru Nziza no gukundisha abantu amahoro, kandi ko yizeye ko ubutumwa bwe buzahabwa agaciro hashingiwe ku kuri k’ubutumwa bw’Imana.
