Polisi yataye muri yombi abafana 8 b’Arsenal bakekwaho kwiba inka
Polisi yo mu Karere ka Tororo muri Uganda yatangaje ko yataye muri yombi abantu umunani bafana ba Arsenal, bakurikiranyweho kwiba inka eshatu mu Mudugudu w’Amagoro “A” South.
Abo bantu bafashwe mugitondo cyo ku Cyumweru nyuma y’iperereza ryari rimaze iminsi rikurikira ibura ry’izo nka. Abaturage bo muri ako gace bavuga ko bakeka ko izo nka zishobora kuba zaribwe mu gihe hari hari ibirori byo kwizihiza intsinzi y’Arsenal yari itegerejwe muri shampiyona y’Ubwongereza, yari imaze imyaka myinshi itabasha gutwara igikombe.
Polisi yavuze ko aba bakekwa bafungiye kuri sitasiyo ya Polisi ya Tororo Central mu gihe iperereza rikomeje kugira ngo hamenyekane ukuri ku byabaye.
Iyi nkuru yakwirakwiye cyane muri Tororo no ku mbuga nkoranyambaga, aho bamwe bayifashe nk’igitangaza ndetse banabivugaho mu buryo bwo gusetsa, mu gihe abandi bo basabye ko hakorwa iperereza ryimbitse kandi ababigizemo uruhare bakabihanirwa.
Kugeza ubu, ubuyobozi ntiburatangaza niba izo nka zarabonetse cyangwa ibyaha bishobora kuregwa aba bakekwa.
