Umuvugizi w’igisirikare cy’u Burundi, Brigadier General Gaspard Baratuza, yavuze ko Major Jérémie Nitunga na Captain Félicien Kanjori bafatiwe muri Repubulika Iharanira Demokarasi ya Congo, ariko ahakana amakuru avuga ko bafungiye i Kinshasa.
Mu kiganiro cy’abavugizi b’inzego za Leta cyabereye i Ngozi kuri uyu wa Kabiri, tariki ya 29 Nzeri 2026, Baratuza yavuze ko abo basirikare bari ku cyicaro cya gisirikare i Baraka, muri Kivu y’Amajyepfo, aho bari gukorwaho iperereza. Yasobanuye ko bafashwe nyuma yo gufata amashusho y’ahari ikirindiro cy’abasirikare, kugira ngo hamenyekane impamvu babikoraga.
Baratuza yavuze ko igisirikare cy’u Burundi gikurikirana iryo perereza, asaba abantu gutegereza ibizarivamo. Yabivuze asubiza amakuru yari yakwirakwijwe ku mbuga nkoranyambaga yavugaga ko abo basirikare bakekwaho kuba intasi z’u Rwanda kandi ko bajyanywe gufungirwa i Kinshasa. Ibyo birego ntiyabyemeye; impamvu nyakuri yo gufata amashusho iracyakorwaho iperereza.
Yahakanye kandi amakuru avuga ko abasirikare ba Tanzania binjiye mu Burundi bakambara imyenda y’igisirikare cyabwo kugira ngo bajye kugifasha mu mirwano yo muri RDC. Baratuza yavuze ko abasirikare b’u Burundi bari muri RDC ku buryo bwemewe, bityo nta mpamvu yo guhisha umwirondoro w’ababa babafasha. Yongeyeho ko u Burundi na Tanzania bidafitanye amasezerano yo guhanahana abasirikare.
Ibitekerezo