U Rwanda n’u Bubiligi byatangaje ko byemeranyijwe gusubukura umubano wa dipolomasi wari umaze umwaka urenga warahagaritswe, nyuma y’ibiganiro byahuje abayobozi b’impande zombi.
Itangazo rihuriweho ryashyizweho umukono ku wa Kabiri w’ejo hashize tariki ya 22 Nzeri 2026 na Minisitiri w’Ububanyi n’Amahanga w’u Rwanda, Olivier Jean Patrick Nduhungirehe, na mugenzi we w’u Bubiligi, Maxime Prévot, rivuga ko iki cyemezo cyafashwe hakurikijwe ingingo ya kabiri y’Amasezerano y’i Vienne agenga umubano wa dipolomasi.
Ambasade y’u Rwanda i Bruxelles n’iy’u Bubiligi i Kigali zizongera gufungurwa mu gihe cya vuba. Mu ikubitiro, buri ambasade izayoborwa by’agateganyo n’ushinzwe ibikorwa bya dipolomasi, afashijwe n’umudipolomate cyangwa umujyanama ushinzwe ibya konsula hamwe n’itsinda rito ry’abakozi ba tekiniki.
Nyuma yaho, ibihugu byombi bizasaba ko abahagarariye inyungu za byo ku rwego rwa ba ambasaderi bemerwa. Ambasaderi w’u Rwanda mu Bubiligi ni na we uzaba ashinzwe kuruhagararira mu Muryango w’Ubumwe bw’u Burayi.
Iki cyemezo cyagezweho nyuma y’uruhererekane rw’ibiganiro n’imibonano itaziguye Nduhungirehe na Prévot bagiranye mu mezi ashize. Byabafashije kuganira ku bibazo byari byaratumye ibihugu byombi bitumvikana no gushaka uko byakemurwa mu buryo bwubaka.
U Rwanda n’u Bubiligi byashimiye Leta ya Qatar yagize uruhare mu gutegura ibiganiro bya mbere byahuje aba baminisitiri bombi i Doha muri Kamena 2025.
Ibihugu byombi byiyemeje gukomeza ibiganiro bifunguye, bivugisha ukuri kandi biboneye, kugira ngo bikemure ibibazo bireba umubano wabyo ndetse binaganire ku byo bikomeje kutavugaho rumwe mu bibazo mpuzamahanga. Byanemeranyijwe ko umubano mushya uzashingira ku kutivanga mu bibazo by’imbere bya buri gihugu, kubahana no gukorana mu buryo bwubaka.
U Rwanda rwahagaritse umubano wa dipolomasi n’u Bubiligi ku wa 17 Werurwe 2025, rushinja Bruxelles kurubangamira no gufata uruhande mu bibazo by’umutekano byo mu Burasirazuba bwa Repubulika Iharanira Demokarasi ya Congo. Abadipolomate b’Ababiligi bari bahawe amasaha 48 yo kuva mu Rwanda, na Bruxelles ihita ifata icyemezo nk’icyo ku badipolomate b’u Rwanda.
Mbere yaho, ku wa 18 Gashyantare 2025, u Rwanda rwari rwahagaritse igice cyari gisigaye cya gahunda y’ubufatanye mu iterambere n’u Bubiligi yagombaga gukorwa hagati ya 2024 na 2029, kubera amakimbirane yari amaze gufata indi ntera.
Isubukurwa ry’umubano rifungura indi ntambwe mu mikoranire y’ibihugu byombi, ariko itangazo ntiryasobanuye niba na gahunda z’ubufatanye mu iterambere zari zarahagaritswe zizahita zisubukurwa.
Ibitekerezo