Ubwato bw’Ubushinwa bwari bwarafatiwe ibihano na Amerika bwanyuze mu muhora wa Hormuz
Ubwato bwitwa Rich Starry bubaruye ku Bushinwa bwari bwarafatiwe ibihano na Amerika mu 2023 kubera gukorana Ubucuruzi na Iran, bwagaragaye bunyura mu Muhora wa Hormuz ku itariki ya 14 Mata 2026.
Rich Starry ni bwo bwato bwa mbere bwafatiwe ibihano n’Amerika bwerekeje mu Bushinwa bunyuze muri uyu muhora kuva aho Amerika itangirije gufunga uwo muhora ku itariki ya 13 Mata 2026.
Iki gikorwa cyatunguye benshi kuko ubu bwato bwanyuze mu muhora wa Hormuz nubwo hariho amananiza (blockade) akomeye yashyizweho na Amerika.
Ubwato bwari butwaye utugunguru tugera ku 250,000 twa methanol bivugwa ko twapakiriwe mu cyambu cya Hamriyah muri Leta Zunze Ubumwe z’Abarabu (UAE).
Iki gikorwa Perezida Donald Trump n’ubuyobozi bwa Amerika bacyise igerageza rikomeye ry’umutekano w’amazi bashyizeho kuri Iran.
Ubu bwato bwabanje kugerageza kunyura muri uyu muhora bugeze hafi y’ikirwa cya Qeshm muri Iran buhita busubira inyuma, nyuma y’amasaha make burongera buragaruka bigaragara ko bwari bufite abakozi bakomoka mu Bushinwa.
Ubundi bwato bwitwa Elpis nabwo bwagaragaye bunyura muri uyu muhora buvuye mu kigobe cya Oman, bivugwa ko bwari buherutse guhagarara ku cyambu cya Iran.
Ubushinwa bukomeje gusaba ko habaho guhagarika imirwano hagasubizwaho uburyo bw’ubwinjiriro n’ubusohokero muri uyu muhora, buvuga ko gufunga uyu muhora bibangamiye inyungu z’isi yose.
