Igisirikare cya Leta ya Yemen, gishyigikiwe n’Arabiya Sawudite, cyatangaje ko cyongeye kugenzura umuhora wa Bab al-Mandab, uherereye ku mpera yo mu majyepfo y’Inyanja Itukura.
Cyavuze kandi ko ku wa Mbere w’ejo hashize, abarwanyi bo mu mitwe ya National Shield, Giants Brigades na Tihama Resistance bigaruriye Umujyi wa Mokha, bafashijwe n’ibitero by’indege z’Arabiya Sawudite.
Icyakora, amakuru yatanzwe n’abategetsi n’abasirikare ba Yemen avuga ko abo barwanyi bari bageze gusa mu nkengero za Mokha. Abantu bane bahaye amakuru ibiro ntaramakuru by’Abongereza, Reuters, bavuze ko abarwanyi b’Abahouthi bari gusubira inyuma.
Abasirikare bavuganye n’ibiro ntaramakuru by’Abafaransa, AFP, na bo bavuze ko batarashobora kwemeza ko Mokha yafashwe. Gusa, bavuze ko ingabo za Leta zigenzura ikibuga cy’indege cya gisirikare cya Dhubab kandi ko zaciye inzira ihuza Dhubab na Bab al-Mandab.
Ku rundi ruhande, ibitangazamakuru bigenzurwa n’Abahouthi byahakanye ko ingabo za Leta zagabye igitero muri Dhubab.
Abahouthi batangaje ko bagabye ibitero ku kibuga cy’indege mpuzamahanga cya Riyadh, ku ruganda rwa Aramco rutunganya peteroli no ku kibuga cy’indege cya Abha, muri Arabiya Sawudite. Nta cyo bari batangaza ku makuru yerekeye Mokha.
Arabiya Sawudite yamaganye ibyo bitero, isaba ibihugu bifite imyanya ihoraho mu Nama y’Umuryango w’Abibumbye ishinzwe Amahoro n’Umutekano gushyigikira Leta ya Yemen.
Ihuriro ry’ingabo riyobowe n’Arabiya Sawudite ryavuze ko indege zaryo zikomeje gufasha ingabo za Leta ya Yemen amanywa n’ijoro. Ryatangaje kandi ko rimaze gusenya ahantu 324 rifata nk’ingenzi mu bikorwa bya gisirikare by’Abahouthi.
Umunyamabanga Mukuru w’Umuryango w’Abibumbye, António Guterres, yamaganye ibitero Abahouthi bagaba muri Arabiya Sawudite, agaragaza impungenge z’uko intambara ikomeje gukaza umurego.
Iyi mirwano iri mu gikorwa cya gisirikare cyiswe “Operation Yemen Dawn”, cyatangajwe ku Cyumweru na Rashad al-Alimi, uyobora Inama y’Ubuyobozi ya Yemen. Kigamije kwigarurira uturere twose tugenzurwa n’Abahouthi.
Minisiteri y’Ubuzima ya Yemen ivuga ko kuva ku wa 6 Kanama, iyi ntambara imaze guhitana abantu 959, abandi 5.000 bagakomereka. Umuryango w’Abibumbye uvuga ko abantu 197,000 bamaze kuva mu byabo bahunga imirwano.
Ibitekerezo