Ibitero by’Abahouthi bo muri Yemen byahungabanyije ingendo z’indege mu murwa mukuru wa Arabiya Sawudite (Arabie Saoudite), Riyadh, bituma izigera kuri 86% by’izari ziteganyijwe zihagarikwa.
Imibare y’urubuga Cirium, rukusanya rukanasesengura amakuru y’ingendo z’indege, igaragaza ko hagati y’itariki ya 8 n’iya 25 Ukwakira 2026, hahagaritswe ingendo 4,071 muri 4,736 zari ziteganyijwe kugera cyangwa guhaguruka i Riyadh.
Mu mezi ashize, Abahouthi bafitanye umubano na Iran bakajije ibitero bya misile n’indege zitagira abapilote (drones) ku bikorwa remezo by’Arabiya Sawudite. Byibasiye ahatunganyirizwa peteroli, ibyambu n’ibibuga by’indege.
Ikibuga cy’Indege Mpuzamahanga cya King Khalid kiri i Riyadh, kikaba icya kabiri muri icyo gihugu mu kwakira ingendo nyinshi nyuma y’icy’i Jeddah, cyagabweho ibitero inshuro nyinshi. Muri byo harimo icyabaye ku wa 10 Ukwakira 2026 cyahitanye abantu 13.
Abategetsi b’Arabiya Sawudite bari batangaje ko icyo kibuga kigiye kongera gufungurwa nyuma y’ibyumweru bibiri kidakora. Icyakora, amakuru yakurikiyeho yagaragaje ko ibitero by’Abahouthi byakomeje, bituma ingendo nyinshi zisubikwa.
Abahouthi na bo baburiye abakoresha icyo kibuga ko bagikomeje kugifata nk’ahantu bashobora kugaba ibitero, bavuga ko kidatekanye.
Ibitekerezo