AFC/M23 yamaganye ibitero by’indege zitagira abapilote bikomeje kugabwa ku baturage
Ihuriro AFC/M23 ryatangaje ko ryamaganye ibitero by’indege zitagira abapilote (drones) bikomeje kugabwa ku baturage n’ingabo zishyigikiye ubutegetsi bwa leta ya Kinshasa batavuga rumwe.
Abinyujije ku rubuga rwa X, umuvugizi w’iri huriro, Lawrence Kanyuka yatangaje ibi mugitondo cyo kuri uyu wa Kabiri tariki ya 11 Ugushyingo 2025.
Yagize ati: “AFC/M23 iramagana bikomeye ibitero by’indege zitagira abapilote (drones) bidahwema gukorerwa n’ingabo zifatanyije na leta ya Kinshasa”.
Ibi bitero, byibasiye abaturage, byagabwe mu ijoro ryo ku wa Mbere tariki 10 rishyira ku wa Kabiri tariki 11 Ugushyingo 2025. Iyi nshuro byabereye i Luki muri Teritwari ya Masisi.
Akomeza avuga ko ibi bitero bibangamiye ibiganiro bya Doha (Qatar) by’amasezerano yo guhagarika intambara hagati ya AFC/M23 na guverinoma ya Repubulika Iharanira Demokarasi ya Kongo (Congo).
Ati: “Ibi bitero, bihonyora ku mugaragaro amasezerano y’ihagarikwa ry’intambara”.
Nubwo bimeze bityo, Kanyuka avuga ko na bo batarekeraho ngo barebere nta cyo bakora mu kurinda ubuzima bw’abaturage b’inzirakarengane buri mu kaga.
Yagize ati: “Ihuriro ryacu rirakora ibishoboka byose mu kurinda no kurengera abaturage bari kwibasirwa n’ingabo za Kinshasa”.
Imirwano ikomeje gushyamiranya AFC/M23 na leta ya Kinshasa mu gihe bakomeje kugirana ibiganiro i Doha byanemerajwemo agahenge ko guhagarika imirwano.
Raporo y’Umuryango w’Abibumbye igaragaza ko kuva muri Mutarama 2025, ubwo AFC/M23 yigaruriraga Umujyi wa Goma, abantu barenga miliyoni 2.4 bavanywe mu bya bo, bituma umubare rusange w’abamaze kuvanwa mu bya bo kubera intambara zo mu burasirazuba bwa Repubulika Iharanira Demokarasi ya Congo ugera hafi kuri miliyoni esheshatu.
Abanyekongo bagera kuri miliyoni imwe bahungiye mu bihugu bituranyi, mu gihe abandi miliyoni 27 babangamiwe n’inzara.
