Hakenewe arenga miliyoni $33 ku mpunzi z’Abanyekongo mu Burundi
Leta y’Uburundi hamwe n’imiryango mpuzamahanga yatangaje ko hakenewe amafaranga arenga miliyoni 33 y’amadolari (ni ukuvuga hafi miliyari 48 FRw) kugira ngo hafashwe abantu bahunze Repubulika Iharanira Demokarasi ya Congo (RDC).
Abahunga bakomeje kwiyongera nyuma y’uko umutwe w’inyeshyamba wa M23 urwanya leta ya Kinshasa wigaruriye Umujyi wa Uvira muri RDC.
Minisitiri w’Ubutegetsi bw’Igihugu, umutekano n’iterambere rusange, Léonidas Ndaruzaniye, yavuze ko kuva ku itariki 5 kugeza ku ya 16 Ukuboza, impunzi 76,015 z’Abanyekongo zahungiye mu Burundi. Yongeyeho ko Abarundi basubiye iwabo bangana na 8,700.
Ibi yabivuze mu nama yari yahuriyemo na Minisitiri w’Ububanyi n’Amahanga, Edouard Birimana, hamwe n’abahagarariye ibihugu bya bo n’imiryango mpuzamahanga.
Umuyobozi w’Umuryango w’Abibumbye (ONU) mu Burundi, Violet Kenyana Kakyomya, yavuze ko impunzi zimerewe nabi kandi hakenewe amafaranga vuba kugira ngo zifashwe mu mezi ane ari imbere.
Yavuze ko hakenewe miliyoni 33 z’amadolari ariko ko ayo mafaranga ashobora kurenga mu gihe impunzi zakomeza kwiyongera mu Burundi.
Uhagarariye Ishami ry’Umuryango w’Abibumbye Ryita ku Mpunzi mu Burundi, Brigitte Mukanga Eno, yavuze ko Umuryango w’Ubumwe bw’Uburayi wemeye gutanga inkunga yihuse, aho ubu hari miliyoni 3 z’amadolari zatanzwe biciye mu ishami rya wo rishinzwe gufasha mu gihe cy’ibiza (ECHO). Yavuze kandi ko hari n’indi miryango yatanze amafaranga yari agamije gukora ibindi bikorwa kugira ngo afashe izo mpunzi.
Impunzi z’Abanyekongo zinjira mu Burundi mu nzira zitandukanye, haba ku butaka no ku kiyaga Tanganyika.
Muri komine Cibitoke, zone Ndava, hari impunzi zirenga 30,000, mu Gatumba hakaba hararengeje 20,000. Mu minsi itatu ishize, mu Rumonge hamaze kugera impunzi zirenga 20,000. Izo mpunzi zoherezwa kandi mu nkambi ya Bweru mu Ntara ya Buhumura mu burasirazuba bw’Uburundi, aho hamaze kugera impunzi zirenga 12,000.
Kuva mu ntangiriro z’uyu mwaka, mu Burundi hamaze guhungira Abanyekongo barenga 35,000 bahunze umutwe wa M23 wigaruriye imijyi ya Goma na Bukavu mu ntara za Kivu ya Ruguru na Kivu y’Epfo. Abo bahasanga abandi barenga 90,000, muri bo abarenga 56,000 bari mu makambi y’impunzi.
Mu ntangiriro z’iki cyumweru, M23 yatangaje ko igiye kuva muri Uvira ariko ko hari ibyo isaba mbere y’uko ibikuyeho birimo kiba uyu mujyi ugomba gucungwa n’ingabo zidafite aho zibogamiye.
Kuva ku mugoroba w’ejo hashize kugeza uyu munsi ku wa Kane, ubuyobozi bwa AFC/M23 bwatangaje ko buba bwamaze gukura ingabo za bwo mu Mujyi wa Uvira mu rwego rwo kubahiriza inzira y’amahoro n’ubusabe bw’Amerika.
