Bazivamo yagizwe Umunyamabanga Mukuru wa RPF-Inkotanyi

Mu mavugurura mashya yakozwe mu miterere n’imiyoborere ya FPR–Inkotanyi, Bazivamo Christophe yagizwe Umunyamabanga Mukuru w’uyu muryango.

Ibi byemejwe n’abanyamuryango bitabiriye Inama Nkuru ya 17 ya FPR–Inkotanyi, aho bemeje umushinga wo kuvugurura amategeko awugenga ndetse n’imiterere ya Komite Nyobozi n’abayigize. Muri ayo mavugurura, hemejwe ko Komite Nyobozi igizwe n’aAbanyamabanga Bakuru babiri n’abavisiperezida babiri.

Muri Komite Nyobozi nshya, Uwimana Consolée yagizwe Visi Perezida wa mbere, mu gihe Kayisire Marie Solange yemejwe nka Visi Perezida wa kabiri.

Ku rwego rw’ubunyamabanga, Bazivamo Christophe yemejwe nk’Umunyamabanga Mukuru, afashwa na Gasana Karasanyi Stephen wagizwe Umunyamabanga Mukuru wungirije.

Bazivamo Christophe asimbuye kuri uwo mwanya Gasamagera Wellars, wari usanzwe ari Umunyamabanga Mukuru wa FPR–Inkotanyi.