Uganda: Abasirikare 4 bakuru barashinjwa ubujura bwa litiro 270.000 za Lisansi
Ku wa 27 Mata 2026, abasirikare bakuru b’ingabo za Uganda (UPDF) bagejejwe imbere y’urukiko rwa gisirikare i Makindye, bashinjwa kunyereza litiro 270,000 za mazutu
Abasirikare bane bo ku rwego rw’abofisiye, barimo ufite ipeti rya Brigadier General, bagejejwe imbere y’Urukiko rukuru rwa Gisirikare rwa Makindye, baregwa ubujura no gukoresha nabi Litiro 270 000 z’ibikomoka kuri Peteroli zagenewe gukoreshwa n’ibikoresho bya gisirikare.
Abo basirikare baregwa ko bakoresheje ayo mavuta mu nyungu zabo bwite hagati ya Nyakanga 2022 n’Ukuboza 2023, mu gihe yari agenewe ibikorwa by’ikigo cya gisirikare cya URDCC (Uganda Rapid Deployment Capability Centre) giherereye i Jinja.
Abaregwa barimo Brig. Gen. James Barigye Ruheesi, wahoze ari umuyobozi w’ikigo gishinzwe ubushobozi bwo kohereza imodoka vuba (URDCC) i Jinja.
Col. David Ocitti Kidega, umukozi ushinzwe Peteroli n’amavuta yo mu modoka muri Joint Staff Logistics.
Maj. Innocent Kikongo Mugumya, umukozi ushinzwe gutwara abantu muri URDCC.
Capt. Kenneth Labwon Kinyera, umukozi ushinzwe amasoko muri Joint Staff Health Services.
Ubushinjacyaha bwabwiye Urukiko ko hagati ya Nyakanga 2022 na Ukuboza 2023, aba basirikare b’Abofisiye bayobeje mazutu yari yagenewe gukoreshwa mu ibikoresho bikomeye bya gisirikare i Kampala na Jinja ku nyungu zabo bwite, igikorwa bivugwa ko cyashyize mu kaga imikorere y’igisirikare.
Aba basirikare bivugwa ko bamaze igihe bafunze kuva muri Mata 2025 nyuma yo gutabwa muri yombi ku itegeko ry’Umugaba Mukuru w’Ingabo General Muhoozi Kainerugaba.
Aba basirikare bahakanye ibyo baregwa imbere y’Urukiko rwa Gisirikare rwari rugizwe n’inteko y’abacamanza batatu iyobowe na Brig. Gen Richard Tukachungurwa.
Ubushinjacyaha bwasabye igihe cy’inyongera cyo kurangiza iperereza, busaba urukiko ko abaregwa bafungwa by’agateganyo.
Abanyamategeko bunganira abaregwa basabye ko hatangazwa abatangabuhamya n’ibimenyetso.
Uru rubanza rwimuririwe ku ya 29 Gicurasi 2026, mu gihe aba basirikare bazakomeza gufungirwa muri kasho ya gisirikare ya Makindye.
Iperereza ryerekanye ko mu mavuta yagenerwaga icyo kigo buri kwezi, agera kuri litiro 25,000 (hafi kimwe cya kabiri cy’ayagombaga kuhagera) yanyerezwaga, bikaba byarateje igihombo kigera kuri miliyaridi 3.5 z’amashilingi ya Uganda mu myaka itatu.
