DJ Toxxyk yafunguwe
Urukiko rw’Ibanze rwa Nyarugenge rwafunguye Shema Arnaud De Bosch alias DJ Toxxyk wamamaye mu kuvanga imiziki akaba yategetswe gukora imirimo y’inyungu rusange mu gihe cy’amezi atatu asubikiye mu mezi atandatu.
Ku itariki 4 Gicurasi 2026 Urukiko rw’Ibanze rwa Nyarugenge rwahamije DJ Toxxyk ibyaha birimo Ubwicanyi budaturutse ku bushake,gukoresha ibiyobyabwenge n’icyaha cyo guhunga cyangwa se gutoroka wamaze gukora impanuka.
Urukiko rwamuhanishije ihazabu ya 1,500,000 Frw,imirimo y’inyungu rusange y’amezi atatu yasubikiwe mu mezi atandatu.
Urukiko rwategetse ko ahita arekurwa umwanzuro ugisomwa.
Ku itariki 20 Mata 2026 Ubushinjacyaha bwari bwasabye Urukiko rw’Ibanze rwa Nyarugenge guhamya Shema Arnaud De Bosscher uzwi nka DJ Toxxyk, ibyaha bumukurikiranyeho birimo ubwicanyi budaturutse ku bushake, rukamuhanisha igihano cy’igifungo cy’imyaka ibiri n’ihazabu ya miliyoni 1 Frw.
Ni mu iburanisha ry’urubanza mu mizi ryabaye kuri uyu wa 20 Mata 2026, nyuma y’uko ku wa 15 Mata rwasubitswe ku busabe bw’uruhande rwunganira uregwa rwifuzaga ko urubanza rwakomeza abamwunganira bari kumwe n’uregwa kuko yaburanye hifashishijwe ikoranabuhanga.
Kuri iyi nshuro, abunganira DJ Toxxyk bari mu Igororero rya Mageragere aho umukiliya wabo afungiwe kugira ngo bamwunganire ariko bari kumwe na we.
Ubushinjacyaha bwasabye Urukiko rw’Ibanze rwa Nyarugenge kumuhamya ibyaha bumukurikiranyeho, agahanishwa igihano cy’igifungo cy’imyaka ibiri n’ihazabu ya miliyoni 1 Frw.
Dj Toxxyk yaregwaga ibyaha birimo ubwicanyi budaturutse ku bushake, gukora ibikorwa byerekeranye n’ibiyobyabwenge cyangwa urusobe rw’imiti ikoreshwa nka byo n’ibindi.
Ni ibyaha bifitanye isano n’impanuka DJ Toxxyk yakoze mu rukerera rwo ku wa 20 Ukuboza 2025, ikagwamo umupolisi, ndetse n’ibiyobyabwenge byasanzwe iwe ubwo hakorwaga iperereza.
DJ Toxxyk we yaburanye yemera ibyaha bibiri by’ubwicanyi budaturutse ku bushake n’icyo guhunga umaze gukora cyangwa guteza impanuka ariko ibyo gukoresha ibiyobyabwenge akabihakana.
Yeretse Urukiko ko yanasabye imbabazi umuryango w’umupolisi yahemukiye kandi wanamubabariye.
