Abantu bagera kuri 41 bapfuye nyuma y’uko ubwato bari barimo burohamiye mu Kiyaga cya Tanganyika, hafi y’Umudugudu wa Mapera muri Repubulika Iharanira Demokarasi ya Congo.
Ubwo bwato bwari buvuye i Kigoma muri Tanzania bwerekeza mu Mujyi wa Kalemie, umurwa mukuru w’Intara ya Tanganyika muri RDC. Norris Mulongoyi, Minisitiri w’Intara ushinzwe ubwikorezi, yatangaje ko bwari butwaye abantu bagera ku 100 n’imizigo itandukanye.
Mulongoyi yavuze ko abantu 49 barokowe, mu gihe ibikorwa byo gushakisha abandi bagenzi bikomeje. Imibare y’ibanze yari yatangaje umubare muto w’abarokotse n’ababuriwe irengero, ariko nyuma iza kuvugururwa uko ibikorwa by’ubutabazi byakomezaga.
Amakuru yatangajwe na Radio Okapi avuga ko ubwo bwato, buzwi ku izina rya MV MJP, bwatangiye kwihengekera ku ruhande mbere yo kurohama. Abari baburimo bavuze ko nta muyaga ukomeye wari uri muri icyo kiyaga igihe impanuka yabaga.
Amakuru y’ibanze kandi avuga ko bwari butwaye imizigo myinshi, irimo toni zirenga 480 z’ifu y’ingano n’imodoka enye. Icyakora, inzego zibishinzwe ntiziremeza niba uburemere bw’iyo mizigo ari bwo bwateje impanuka. Iperereza rirakomeje kugira ngo hamenyekane icyatumye ubwo bwato burohama.
Impanuka z’ubwato zikunze kuba muri RDC, ahanini zigashyirwa ku gutwara abantu cyangwa imizigo birenze ubushobozi, ubwato butujuje ubuziranenge no kubura ibikoresho bihagije byo kurokora ubuzima, birimo amakoti afasha abantu kutarohama.
Ikiyaga cya Tanganyika ni inzira ikomeye ihuza Tanzania na RDC, ndetse kikaba gifasha abaturage benshi bo mu turere tugikikije gutwara abantu n’ibicuruzwa. Mu bice byinshi bya RDC, ingendo zo mu mazi ni ingenzi kubera imihanda mike, iyangiritse cyangwa itabaho.
Ibitekerezo