Abantu ibihumbi bashyigikiye ishyaka UDPS n’abafatanyije na ryo bakoze imyigaragambyo i Kinshasa ku wa Kabiri, tariki ya 22 Nzeri 2026. Bagaragaje ko bashyigikiye ibiganiro by’igihugu byatangajwe na Perezida Félix Tshisekedi, amatora ya referandumu ndetse n’igitekerezo cyo guhindura Itegeko Nshinga rya Repubulika Iharanira Demokarasi ya Congo (RDC).
Bamwe mu bitabiriye iyo myigaragambyo bari bafite ibyapa bishyigikira ibiganiro no guhindura Itegeko Nshinga. Filston Mbuyamba yabwiye BBC ko bifuza ko abaturage bagira ijambo ku itegeko ribagenga. Jonas Mulamba wo muri UDPS na we yavuze ko abayoboke b’ishyaka ryabo bagiye mu mihanda kugira ngo bagaragaze ko bashyigikiye impinduka.
Augustin Kabuya, uyobora UDPS by’agateganyo, yasabye Perezida Tshisekedi kumva icyifuzo cy’abitabiriye imyigaragambyo bashaka ko Itegeko Nshinga rihinduka. Izi mpaka ziri kuba mu gihe mu Nteko Ishinga Amategeko hagaragara umushinga w’itegeko rijyanye n’imitegurire ya referandumu.
Icyakora, si ko abagiye mu muhanda bose bashyize imbere Itegeko Nshinga. Nathalie Ngalula yavuze ko yifuza uburezi bwiza ku bana, ibiribwa bihagije n’imibereho myiza y’abaturage. Esther Tshonga we agaragaza icyizere ko ibiganiro by’igihugu byafasha Abanyekongo gushakira hamwe umuti w’intambara yo mu burasirazuba bw’igihugu.
Iyo myigaragambyo ibaye nyuma y’icyumweru ihuriro ry’abatavuga rumwe n’ubutegetsi, C64, na ryo ryigaragambije ryamagana guhindura Itegeko Nshinga. Abagize iryo huriro bavuga ko impinduka zishobora gufungurira Tshisekedi inzira yo kwiyamamariza manda ya gatatu. Imyigaragambyo yabo yaranzwe n’imvururu, bituma Minisitiri w’Ubutabera asaba ko hakorwa iperereza; iy’abashyigikiye ubutegetsi yo yagenze nta mvururu zikomeye zivuzwe.
Ibitekerezo