Amayobera ku bwato bwo muri Atlantique: Hantavirus yahitanye batatu, abandi barayandura

Abantu babiri bamaze gusuzumwa basanga baranduye indwara ya hantavirus, nyuma y’uko abandi batatu bamaze gupfa bakekwaho iyo ndwara.

Hagati aho, hari n’umuturage w’Umwongereza uri mu ndembe, nyuma y’uko hakekwa ko iyi ndwara yagaragaye mu bwato butwara abagenzi buri mu nyanja ya Atlantique.

Sosiyete ikora ubucuruzi bw’ubwato, Oceanwide Expeditions, yatangaje ko umugabo n’umugore bakomoka mu Buholandi hamwe n’umuturage w’Ubudage ari bo bamaze guhitanwa n’iyi ndwara.

Indwara ya hantavirus yemejwe ku mugabo w’Umwongereza w’imyaka 69 uri kuvurirwa muri Afurika y’Epfo, aho ari mu gice cyita ku barwayi barembye cyane (ICU). Iyo ndwara kandi yagaragaye no ku mugore w’Umuholandi wapfuye.

Impamvu nyakuri zateye urupfu rw’abandi bantu babiri ntiziramenyekana neza, kuko iperereza rigikomeje nk’uko BBC yabitangaje.

Hantavirus ikwirakwizwa cyane n’imbeba, binyuze mu myanda ya zo, amatembabuzi cyangwa amacandwe, ndetse rimwe na rimwe umuntu akayandura iyo arumwe n’imbeba. Iyi ndwara ishobora gutera ibibazo bikomeye mu myanya y’ubuhumekero.

Icyakora, si kenshi iyi ndwara yandurira hagati y’abantu.

Kugeza ubu, ubwato bwa MV Hondius buri hafi y’inkengero za Cape Verde, bukaba butwaye abantu 149 baturutse mu bihugu 23 bitandukanye.