Abayobozi b’Amerika na Iran bagiranye ibiganiro i New York ku wa Kabiri w’ejo hashize, tariki ya 22 Nzeri 2026, ku ruhande rw’inama rusange y’Umuryango w’Abibumbye.
Ibyo biganiro byahuje intumwa ya Perezida Donald Trump, Steve Witkoff, na Minisitiri w’Ububanyi n’Amahanga wa Iran, ku buhuza bwa Qatar. Kugeza ubu, nta masezerano yatangajwe.
Witkoff yavuze ko igice cya mbere cy’ibiganiro cyarangiye, agaragaza icyizere ko bizakomeza mu buryo bwubaka. Iran yo isaba Amerika guhagarika ibikorwa yita iby’ubushotoranyi. Ibihugu byombi byongeye kuganira nyuma y’uko agahenge kari hagati yabyo gahungabanye muri Kamena.
Ibiganiro byabaye ku munsi Trump yavugiye mu nama ya ONU ko ashaka amasezerano na Iran, ariko anavuga ko Amerika ishobora gufata ingamba zikomeye mu gihe intambara yakomeza. Mu ijambo rye, yashimangiye ko atazemera ko Iran itunga intwaro za kirimbuzi, anavuga ko ibitero Amerika na Israel byagabye kuri Iran guhera ku wa 28 Gashyantare byari bikenewe. Iran yahakanye kenshi ko ishaka gukora izo ntwaro.
Intambara yanagize ingaruka ku bwikorezi bwo mu muhora wa Hormuz, inzira ikomeye inyuzwamo peteroli na gazi bijya ku masoko mpuzamahanga. Imbogamizi zo kuyinyuramo zakomeje guteza impungenge ku itangwa ry’ibikomoka kuri peteroli no ku biciro byabyo. Iran ivuga ko koroshya urujya n’uruza muri uwo muhora bizaterwa n’uko Amerika igabanya igitutu cya gisirikare kandi igakuraho inzitizi yashyize ku byambu byayo.
Ibyavuye mu biganiro by’i New York ntibiramenyekana, ariko kuba impande zombi zongeye guhura byafunguye inzira yo gukomeza gushaka umuti wa dipolomasi.
Ibitekerezo