Leta Zunze Ubumwe z’Amerika zemeye gutanga izindi miliyoni 267 z’amadolari (ni ukuvuga miliyari zisaga 400Frw) zo gufasha kurwanya icyorezo cya Ebola muri Afurika yo Hagati, cyane cyane muri Repubulika Iharanira Demokarasi ya Congo (RDC). Aya mafaranga yatangajwe ku wa Gatatu tariki ya 23 Nzeri 2026, mu gihe i New York hateraniye Inteko Rusange y’Umuryango w’Abibumbye.
Amerika yizeye ko n’ibindi bihugu bizatanga inkunga, kugira ngo haboneke miliyari ebyiri z’amadolari ziteganyijwe mu bikorwa byo guhangana n’icyo cyorezo. Inkunga nshya itumye amafaranga ubutegetsi bwa Perezida Donald Trump bumaze kwemera gutanga agera kuri miliyoni 886 z’amadolari, harimo miliyoni 107 zatanzwe n’Urwego rw’Amerika rushinzwe Ubuzima na Serivisi z’Abaturage.
Ebola yagaragaye muri Gicurasi 2026. Ubu ni cyo cyorezo cya Ebola cya kabiri kimaze guhitana abantu benshi mu byabayeho, nyuma y’icyibasiye Afurika y’Uburengerazuba hagati ya 2014 na 2016.
Minisitiri w’Intebe wa RDC, Judith Suminwa Tuluka, yabwiye Inteko Rusange ya Loni ko iki cyorezo ari ikigeragezo gikomeye ku gihugu cya bo. Yavuze ko kurwanya Ebola biri mu byo leta ishyize imbere, yifashishije ubunararibonye yakuye mu guhangana n’ibindi byorezo 16 yabashije guhagarika. Yongeyeho ko ibikorwa bya leta, bifashijwe n’abafatanyabikorwa mpuzamahanga, byatangiye gutanga umusaruro.
Abayobozi b’Amerika bavuga ko inkunga izafasha kubaka ibigo byita ku barwaye Ebola, gutanga ibikoresho byo gupima no gushyigikira abakozi bo kwa muganga bari mu bikorwa byo kurwanya icyorezo.
Ibitekerezo