Ihuriro ry’amashyaka atavuga rumwe n’ubutegetsi muri Repubulika Iharanira Demokarasi ya Congo, C64, ryamaganye ubwicanyi bwabaye mu myigaragambyo yo ku wa 15 Nzeri 2026 i Kinshasa.
Mu itangazo ryasohotse ku wa 17 Nzeri, iri huriro ryavuze ko Manassé Lomboto Bomengola, wari umuyoboke w’ishyaka ADDCONGO, yapfuye azize ibikomere yagiriye muri iyo myigaragambyo.
C64 yashinje amatsinda ashyigikiye ubutegetsi na bamwe mu bapolisi kugira uruhare muri ubwo bwicanyi. Yatangaje kandi ko hari abantu bakomeretse, abandi bagafungwa ndetse n’imitungo ikangizwa, isaba ko hakorwa iperereza ryigenga kugira ngo ukuri kumenyekane.
Iri huriro ryasabye ko abafashwe barekurwa, abakekwaho kugira uruhare mu ihohoterwa bagashyikirizwa ubutabera, ndetse n’umutwe w’urubyiruko witwa Force du Progrès ugaseswa.
Icyakora, ubuyobozi bw’Umujyi wa Kinshasa bwahakanye ko hari umuntu wapfiriye muri iyo myigaragambyo. Minisitiri w’Intara ya Kinshasa ushinzwe umutekano n’ubutegetsi bw’imbere, Jeannot Canon La Rose, yavuze ko abantu bake bakomerekeye ku mpande zombi, barimo n’umuyobozi wa Polisi muri iyo ntara. Yongeyeho ko abantu bagera kuri 20 batawe muri yombi.
Polisi yakoresheje ibyuka biryana mu maso n’amasasu yo kuburira mu gutatanya abari bitabiriye iyo myigaragambyo.
C64 yongeye gushimangira ko itazemera ko Itegeko Nshinga rihindurwa hagamijwe guha Perezida Félix Tshisekedi amahirwe yo kwiyamamariza manda ya gatatu mu matora ateganyijwe mu 2028.
Ibitekerezo