Urukiko rwa Gisirikare rwa Uvira, mu Ntara ya Kivu y’Amajyepfo, rwakatiye igihano cy’urupfu abasirikare 18 bo mu Ngabo za Repubulika Iharanira Demokarasi ya Congo (FARDC), nyuma yo kubahamya icyaha cy’ubugwari ku rugamba.
Abo basirikare bose babarizwaga muri Batayo ya Simba. Urukiko rwemeje ko ibyaha bari bakurikiranyweho bikomeye ku buryo nta mpamvu nyoroshyacyaha yashoboraga kwitabwaho mu kubakatira.
Umwanzuro w’urukiko watangajwe ku wa 4 Nzeri 2026, nyuma y’uko ubushinjacyaha bwa gisirikare na bwo bwari bwasabiye buri wese muri abo basirikare igihano cy’urupfu.
Perezida w’Urukiko rwa Gisirikare rwa Uvira, Colonel Magistrat Mupenda Munangi Joel, yatangaje ko urukiko rwabahamije ibyaha bashinjwaga, maze rubakatira igihano cy’urupfu nta mpamvu nyoroshyacyaha rwemeye.
Amakuru yatanzwe n’Urwego rw’Itumanaho rw’Ingabo muri Secteur Opérationnel Sukola 2 Sud Sud-Kivu agaragaza ko iburanisha ry’aba basirikare ryabaye hagati ya tariki ya 24 n’iya 26 Kanama 2026. Muri icyo gihe hakozwe ibikorwa birimo kumenya umwirondoro w’abaregwa, gusuzuma dosiye no kumva impande zitandukanye.
Ubushinjacyaha bwari buhagarariwe na Capitaine Magistrat Amisi Mubwala Boko, ari na bwo bwasabye ko abasirikare bose uko ari 18 bahabwa igihano kiruta ibindi.
Igisirikare cya RDC cyatangaje ko uru rubanza rugamije no gutanga isomo ku bandi basirikare, hagamijwe gukumira imyitwarire nk’iyo no gukaza imyitwarire n’ikinyabupfura mu ngabo.
Iki cyemezo gifashwe mu gihe Kivu y’Amajyepfo ikomeje guhura n’ingaruka z’intambara yo mu burasirazuba bwa RDC. Umujyi wa Uvira uracyagenzurwa na FARDC kandi ni ho zimwe mu nzego z’Intara ya Kivu y’Amajyepfo zimukiye by’agateganyo nyuma y’uko Bukavu ifashwe na M23.
Urukiko rwategetse kandi ko amafaranga yakoreshejwe muri uru rubanza azishyurwa n’Ikigega cya Leta.
Kugeza ubu, amakuru yatangajwe kuri uru rubanza ntagaragaza niba aba basirikare 18 bajuririye iki cyemezo cyangwa igihe igihano bahawe cyashyirirwa mu bikorwa.
Ibitekerezo